UTRECHT—Ayera kasi 466.000 studiante e beka básiko riba nan kuenta bankario. Ta promé biaha den 8 aña studiantenan ta haña plaka gratis di gobièrnu.

Minister di Enseñansa Dijkgraaf ta kontentu i orguyoso. Komo resultado menos studiante ta hasi fiansa. Studiantenan ku ta biba na kas a haña ayera 110,30 euro. Studiantenan ku ta biba riba kamber ta haña 439,20 euro pa luna, esaki ta inkluso un oumento temporal di 164,30 euro pa sostene forsa di kompra. Dependiendo di entradanan di nan mayornan ta bini un beka adishonal. DUO a paga un total di 130 mion euro ayera. Komo minister Dijkgraaf ta kontentu di por a deposita e suma riba e kuentanan di e studiantenan. Komienso di luna a bira konosi ku mas studiante lo a pidi e beka básiko ku a premirá. Pa studiantenan ku ta kaba nan estudio denter di 10 aña, ta pasa e fiansa den un regalo. Investigadonan ta premira ku studiantenan ta bai biba mas konsiente awor ku reintrodukshon di e beka básiko. DUO ta informá ku e promedio fiansa a baha kompará ku 2022 di 677 pa 575 euro. ademas, e kantidat di studiantenan ku ta fia a baha ku 93.000.