Tres persona a keda detené ayera den oranan di mardugá.

BAPOR KIBRÁ,– Ayera den oranan di mardugá detenshon mester a kai den área di Mambo Boulevard relashoná ku benta di droga.

Ta asina ku personal di seguridat Overval Preventie Team, a tene detenshon di e bendedó di droga, un hòmber Hulandes i dos kumpradó di droga, kual tabata dos hòmber Yu di Kòrsou. Segun informe, e sospechoso tabata bende droga den habrí riba e Boulevard ariba i mesora ku personal di vigilansha a nota di e situashon, a tene detenshon di e hòmbernan.

Despues dje detenshon di e trio, e hòmbernan a keda transportá dor di personal di KPC pa warda di polis pa asina sigui ku e investigashon. Bishitantenan di e laman a indiká ku ta trata di bendementu di kokaina, kual a konkluí ku detenshon di e personanan.

For di komienso di aprel, gerensia di Mambo a reforsá seguridat riba un forma di “zero toleransia”. Segun reglanan di zero toleransia, si un bishitante no kumpli ku e reglanan stipulá di Mambo BLVD, seguridat tin tur derechi pa pidi un bishitante pa bandoná e sitio. Un di e reglanan prinsipal ta ku tur bishitante mester tin un sédula bálido i alabes mester presentá e sédula na seguridat akaso seguridat pidi pa esaki.

A reforsá seguridat na aprel despues ku vários reklamo di bishitante a kuminsá drenta serka e gerensia i subi riba ret sosial tokante benta di droga den e área turístiko. Mirando ku benta di droga na e laman, por afektá seguridat i bienestar di e bishitante na Mambo, gerensia a opta pa imponé “zero tolerensia” for di 1 di Aprel 2023.

Apénas 3 dia despues ku e reforsá seguridat ku personal di “Overval Preventie Team”, e promé detenshon nan a kuminsá kai na e playa.