Willemstad,– Parlamentario pa partido PAR, señor Steven Croes ta bisa ku e biahe pa Hulanda di minister di enseñansa señor  Sithree van Heydoorn ta un “snoepreisje”.

E minister lo biaha pa Hulanda huntu ku e bekadonan i señor Croes ta bisa ku esaki ta basta straño, paso apénas e minister tin un par di siman i ainda e no a haña chèns pa wak niun dosssier i papia ku “stakeholdernan” pa wak kiko ta biba den enseñansa. E ta bisa ku esaki ta tuma su tempu i ora e ta kla e lo por plania un biahe pa Hulanda pa wak kiko nan por yuda kuné.

Parlamentario Croes ta bisa ku awor aki tur “gesprek” ta riba nivel di ámtenar. E ta bisa ku e biahe ta straño i e ta komprondé ku van Heydooorn kier bai Hulanda, pero ku awor aki ta hopi hopi kurú pa e bai Hulanda.

E ta bisa ku van Heydoorn lo por sera konosí aya na Hulanda, pero pa loke ta kontenido sigur nan lo dirigié na ámtenarnan di enseñansa na Hulanda, paso ta nan ta enkargá awor aki ku e nul meeting. “Pa bai Hulanda djis pa sera konosí, mi ta haña ku e ta un trep hopi karu djis pa sera konosí”, asina Steven Croes a duna di konosé.

“Bo por papia ku e bekadonan promé ku nan bai Hulanda i splika nan e retonan ku nan ta bai enfrentá, paso ora ku tur yega Hulanda, e mesun dia tur ta kue nan destinashon i bo no ta mira nan mas. Pues no tin nesesidat pa bai ku nan, tin mas nesesidat pa promé ku na biaha papia ku nan i splika nan e reto ku nan ta bai topa”, pues parlamentario Croes.

E ta bisa ku el a  komprondé ku SSC ta spònser e biahe pa minister i ku e ta bai puntra SSC ta kon bini esaki, e kier sa kiko ta e motivashon pa nan a hasi esaki.

Croes ta bisa ku e minister mester motivá su agènda i ta kiko el a señalá den su promé dianan komo minister di enseñansa i dikon e ta kere ta nesesario pa e bai Hulanda. E parlamentario ta puntra kuantu skol minister a bishita, kuantu “stakeholder” el a papia kuné te pa e komprondé kiko ta e problemanan i pa analisá esakinan te pa e plania un trep pa Hulanda ku ta kosta basta sèn.

Señor Steven Croes a bisa ku e ta spera ku for di e splikashon di minister lo por sali un kontesta bon, dikon e ta bai Hulanda. “Nos ta den temporada di krísis i awor aki pais no tin sèn pa nada i ta spera ku gabinete Pisas bini ku un maneho pa ku biahe nan di trabou ku nan lo hasi”, pues Steven Croes.