Minister di Enseñansa, Siensia, Kultura i Deporte Sithree “Cey” van Heydoorn.

WILLEMSTAD – Na University of Curaçao (UoC) e gastnan mas importante ta gastu di personal, konsiderando ku e meta núkleo di e organisashon ta promoshon di siensia i konosementu serka hende. E faktor humano ta eminente den e proseso di formashon i investigashon akí. Asina Minister di Enseñansa, Siensia, Kultura i Deporte Sithree “Cey” van Heydoorn ta splika Parlamento.

E gastunan total den 2022 a suma kasi 18 mion i mei florin repartí den 15 mion i mei na gastu di personal, 2 mion i mei na gastunan relashoná ku edukashon i kasi 418 mil florin na servisionan relashoná ku studiantenan. Na gastunan operashonal e suma ta 5.1 mion florin. E relashon entre gastu di enseñansa versus gastu operashonal ta 78% pa personal i 22% pa operashon.

Van Heydoorn riba e pregunta kuantu empleado UoC tin. “UoC tin un kantidat di 132 empleado ku ta traha fultaim i unu ku ta traha ménos ora. E staf akadémiko di UoC ku ta enkargá ku enseñansa, investigashon, “bestuurlijke taken” manera komishon di èksamen, komishon di kuríkulo, direktor di programa den e 5 fakultatnan ta konta 68.3 (fte)persona. Ademas UoC ta hasi uso di masoménos 150 part-timers. E staf di sosten ta distinguí den “stafafdeling”. Esakinan ta duna sosten direkto na e proseso primario ku ta enseñansa i investigashon ku ta: Aseguro di Kalidat, Rekurso Humano, Servisio na Studiante, Sentro di Enseñansa Digital. E staf di sosten operashonal su tarea ta mas pa operashon di UoC, ku ta Merkadeo i Komunikashon, Finansa, Biblioteka, ICT, Fasilidat i Mantenshon, Campus i Mensa restaurant ta konta ku 64.5 (fte)persona.”

E Minister ta aklará ku no ta tur dosente ku ta trata na UoC ta den servisio permanente:68.3 di fakultat ta den servisio permanente i ta usa alrededor di 150 persona ku ta traha partaim. Tin algun materia tambe ku ta hopi spesialisá pa kua UoC ta usa profeshonalnan den e materia pa duna lès den esaki. “Un otro motibu portá pa usa part-timer ta ku no por haña hende kapas pa drenta den servisio, òf kisas e kantidat di lès ku mester duna no ta hustifiká pa tuma un hende den servisio pa esakinan. Den e kasonna akí UoC ta usa part-timer òf dosente ousiliar.” E dosentenan ku ta traha partaim akí ta risibí un kombenio di tarea (Overeenkomst tot Opdracht) ku ta indiká kuantu ora nan ta traha. E tarifa ta 75 florin pa dosente ku un grado HBO i 105 pa un dosente ku un grado akadémiko. Ta usa dosentenan HBO mas pa e partinan práktiko di e lèsnan a base di nan konosementu práktiko i eksperensia den e materia.