UoC ta bai hasi un enkuesta den Sentro di bario Sapaté pa asina midi komposishon di e personanan den e bario pa asina por uza esaki pa programanan basá riba desaroyo pa bario.

Willemstad, — Promé ku fin di aña lo bai hasi un enkuesta  sosial ku lo aportá na desaroyonan den bario di Sapaté.

Benito Bute, ku ta forma parti di e komishon di sentro di bario Sapaté a duna di konosé ku UoC lo bai hasi un enkuesta sosial den e bario pa asina haña un mihó bista di habitantenan den e bario. Esaki ta importante segun sr Bute, pasombra mester sa ken e habitantenan ta promé ku traha programa di desaroyo pa e bario.

Ta trata aki di un “intake gesprek” pa asina midi nesesidat di e bario. Benito Bute a duna di konosé ku mester midi e komposishon di e hendenan den bario. Mayoria mucha a bai Hulanda i mayoria hende den bario ta personanan mas grandi. Benito Bute a kompartí ku tin diferente sekshon den bario pa lokual ta trata e komposishon di hende ku ta biba den e bario.

Benito Bute a bisa ku por ehèmpel tin hende ta biba na apartamento, tin hende ku a bin biba den kasnan mei mei di e bario, i tambe tin e kasnan di FKP. Segun sr Bute kada sekshon tin nan problemanan i nan nesesidat. E enkuesta sosial ta pa analisá e desaroyonan ku mester bini pa asina yena nesesidatnan di esnan ku ta biba den bario di Sapaté.

E resultado di e enkuesta lo duna un mió bista i mas informashon ora traha programanan pa e bario. Benito Bute a kompartí ku desaroyonan ta andando den e bario. E bon notisia ta ku lo bai asfaltá kaya i lo bai pega lus den e bario di Sapaté uzando fondo Oropeo pa e desaroyonan aki. Ademas Benito Bute a duna di konosé ku e bario mester di profeshonalnan pa asina traha den e bario ya komo no tin masha hende ku ta dispuesto pa hasi trabou di boluntario den e bario.