Sektor di agrikultura ta keda un sektor difísil pa stimulá na Kòrsou.

Willemstad,– Riba 3 di novèmber 2023 tres studiante di e fakultat di lei a entregá nan investigashon kaminda e analisá kon nos leinan aktual ta afektá e sektor di agrikultura.

Studiantenan Marloes Vis, Aline Abdul Baki i Fharamabella Plantijn a ehekutá e investigashon kaminda a investigá kuantu e kunukeronan lokal ta sinti ku e leinan vigente ta afektá e sektor agrario i sektor agrikultor. Mas aleu, e studiantenan a evaluá si e leinan vigente a logra e metanan stipulá.

Pa duna kontesta na e pregunta prinsipal a investigá kon e organisashon di e sektor agrikultor ta hinká den otro, tambe a investigá si kòntròlnan nesesario ta e método mas efektivo pa logra e metanan stipulá den e leinan i finalmente a analisá ki aspekto eksterno tin influensha riba efektividat di e leinan vigente ku tin di haber ku e sektor agrario i agrikultor.

Basá riba resultado di e investigashon a konkluí ku tin basta regla na vigor, pero debí na falta di kòntròl e kunukeronan ta eksperenshá e sektor komo un sektor kaótiko. Mas aleu, e resultá ku e kultura kaótiko ta kousa frustrashon bou di e kunukeronan komo ku e situashon kaótiko ta finalisá ku e entrada di e kunukeronan ta sufri.

Sinembargo, a resultá ku debí ku no tin un organisashon sentral pa hèndel ku asuntunan di agrikultura, e aspekto di kòntròl ta keda un problema. Tambe e studiantenan a indiká ku basá riba nan investigashon a nota ku edukashon i desaroyo tambe ta un hunga un ròl pa oumentá efektividat di e proseso kontrolaria.

Pa duna kontesta riba kon e leinan ta afektá e sektor agrikultor tur tres studiante a konkluí ku e kunukero ku no sa e leinan vigente no por wòrdu afektá dor dje lei. Basá riba sifranan disponibel e investigashon ta splika ku e plan di gobièrnu a faya na momentu mester diskutí tokante inklusividat di e kunukero. Tambe e investigashon a konkluí ku komo e kunukero no konosé su derechi, esaki ta kontribuí na e “kaos” den e sektor agrikultor. E kunukero ta traha riba su kunuku i no tin tempu pa siña e leinan vigente, e investigashon a konkluí.

E investigashon kaminda a investigá e efekto di lei riba e sektor di agrikultura i seguridat di kuminda a keda hasí na Universidat di Kòrsou.

Den pasado ministerio di GMN a kuminsá ku diferente trayekto pa stimulá agrikultura bou di hubentut. E meta tabata pa krea un pilar ekonómiko adishonal i alabes pa redusí e dependensia di kuminda importá. Na un banda ta stimulá e ekonomia lokal i na otro banda e nivel di divisa ta oumentá komo ku ménos rekurso finansiero ta sali for di Kòrsou.

E éksito di e trayekto pa stimulá agrikultura ketubai ta diskutibel. Kaminda un grupo di agrikultor a indiká ku nan a stòp ku e trayekto komo ku nan no a risibí sosten finansiero pa nan proyekto, otro agrikultornan manera D-Farm a logra sobresalí i produsí bèrdura “full time”.