Fabi Constancia

STA ROSA/BOKA SAMÍ—Dos dama influyente i miembronan den Hunta di Direktiva na Sta Rosa i Boka Samí ta bai studia proposishon Remfis Donker pa yega na un solushon temporal den futbòl lokal.

Manera ta konosí tin algun proposishon pa yega na un solushon, kual unu ta prosedente di e grupito Jean Fransisca miéntras un di dos ta prosedente di Remfis Donker. Hassnah Elhage, den un reakshon na Vigilante no a duna muchu detaye pero a konfirmá ku “nos ta bai tira un bista riba proposishon di Donker”. Segun Elhage, kende ta den direktiva di Victory Boys i konsiderá un dama “power house” den futbòl lokal, e proposishon di grupo Fransisca tin algun detaye ku nan no ta mira, ademas e por kousa mas problema segun Elhage, apesar di e bon intenshon.

Nan no a logra diskutí esun di Donker ainda pero na promé instante e ta mustra bon, segun Elhage. Mas aleu por a komprondé tambe ku Brunken alabes tabatin kontakto ku Donker riba su proposishon i ayera e dosnan, esta Hassnah i Empie a keda nan tuma kontakto ku otro. Segun Elhage, e por a komprondé ku tin mas proposishon pendiente pa subi mesa.

Na kant’i laman, Boka Samí tambe e kosnan ta mustra bon pa proposishon Donker. Fuentenan a revelá na Vigilante ku Yabi Constancia, un dama, tambe, super influyente den futbòl i eks miembro den direktiva tin mira positivo riba e proposishon di Donker. Vigilante lo trata na yega na Boka Samí pa logra drenta den kontakto ku Yabi òf ku Pipi Constancia. Jong Colombia tambe a keda na diskutí e proposishon di Donker den nan seno.