BRIEVENGAT – Femke Bol a kuminsá su temporada di atletismo na airu liber ku dos rèkert personal riba 100 i 150 meter plano.

E atleta di Amersfoort a registrá un tempu di 11,47 sekònde riba e distansia di 100 meter i 17,10 sekònde riba e distansia no usual di 150 meter durante Curaçao SprintFest den Stadion Ergilio Hato.

Nunka ántes e kampion mundial di 400 meter ku opstákulo no a kore e tempunan aki riba e dos distansianan menshoná. E atleta Lieke Klaver tambe a impreshoná riba ámbos distansia resultando esun mas velos den e kareda di 150 meter.

E atleta di Enkhuizen tambe a sa di mehorá su rèkert personal ku un tempu di 11,33 sekònde riba e distansia di 100 meter i riba e distansia di 150 meter a registrá un tempu di 16,96 sekònde. Klaver a finalisá di tres den 100 meter. Femke Bol a finalisá di seis riba 100 meter i di tres riba 150 meter.

Un grupo grandi di atleta Hulandes ta preparando nan mes na Kòrsou pa partisipá na e kampionato mundial di relevo ku ta tuma lugá riba 4 i 5 di mei próksimo na Bahamas. Den e evento aki e ekiponan di relevo lo tin e oportunidat di logra nan klasifikashon pa e weganan olímpiko na Paris.