Ademas di hasi kòntròl, dentistanan lo eduká mayornan i muchanan tokante práktikanan di salú dental adekuá, inkluyendo téknika di limpia djente i e importansia di bishita regular na dentista.

Willemstad, — Djadumingu último dia 29 di òktober tabatin un enkuentro na Sentro Multifunshonal Fuik, den kual boluntarionan higienistá, lokal i internashonal, a ofresé kuido dental na muchanan i hóbennan entre 0 pa 18 aña.

Denice Bezemer- Hoyer di e proyekto ‘Un Smail pa Kòrsou’,  a menshoná ku mayoria mayor tin falta di informashon di kuido dental pa nan yunan. Segun Denice Bezemer- Hoyer, mayoria mayor ku no ta sigurá na SVB pa kuido dental ta kere ku nan yunan tampoko no ta sigurá pa kuido dental na SVB. Esaki no ta kuadra segun Denice Bezemer- Hoyer, pasombra muchanan i hóbennan entre 0 pa 18 aña tin derechi riba kuido dental i esaki ta wòrdu kubri di parti di SVB.

E biaha aki huntu ku  Smiles World, e  Asosiashon Hulandes di Higienista Dental, i ku Mondhygienistenvereniging di Kòrsou ta uni un biaha mas pa asina konsientisá pueblo di Kòrsou tokante e importansia di salú oral i hasi práktikanan dental aksesibel pa esnan ku mas mester di dje. Den kuadro di esaki a introdusí e proyekto ‘Un Smail pa Kòrsou’, pero pa muchanan i hóbennan di Bandariba. Denice Bezemer- Hoyer a menshoná ku na Sentro Multifunshonal Fuik a duna un seshon di informashon di kuido dental na mayor i yunan i despues e muchanan i hóbennan a haña kontròl.

Denice Bezemer- Hoyer a menshoná ku ke hasi kuido dental mas aksesibel pa muchanan i hóbennan entre 0 pa 18 aña ya komo hopi ainda ta konsiderá tratamentu dental komo un luho i ta buska yudansa solamente si ta sinti doló; loke hopi bia ta resultá den rankamentu di djente. Ku aksesibilidat Denice Bezer-Hoyer kemen ku ke kibra e distansha entre e grupo aki i kuido dental. Promé ku e pandemia di COVID-19, a konstatá ku higiena oral na Kòrsou, partikularmente entre esnan ménos afortuná, ta laga hopi di deseá.

Denice Bezemer- Hoyer a menshoná ku Smiles World, e Asosiashon Hulandes di Higienista Dental, a aserká e Mondhygienistenvereniging  di Kòrsou i na 20 di mart di aña 2022 a tene un programa piloto na Sambil ku sosten di Smiles World, i diferente empresanan lokal. For di e programa piloto a resultá ku 60% di e muchanan di e programa piloto a resultá di tin buraku den djente i nesesidat pa atenshon dental tabata mas haltu ku loke a spera.

E proyekto ‘Un Smail pa Kòrsou’ tin tres meta general;hasi práktikanan di salú dental mas aksesibel pa e muchanan ku mas mester di dje, konsientisá mayornan ku e muchanan ta sigurá pa kuido dental i promové edukashon riba higiena dental. E biaha aki boluntarionan tabata tei presente na Sentro Multifunshonal na Fuik i ta spera di a trese un sonrisa riba kara di muchanan di Bandariba.