Back to Top
Responsive image
E korant di pueblo

Booster shòt ta provokando debate tokante salú mundial


August 18, 2021 • 2 minüt pa lesa

Direktor general di WHO ta supliká paisnan pa no implementá un èkstra shòt di bakuna te ora tur pais logra bakuná 10% di nan poblashon

PUNDA-  Awor ku e variante Delta ta plamando rònt mundu i kousando oumento den kasonan di infekshon bou di personanan bakuná i esnan no bakuná, funshonarionan di Salú Públiko a keda konfrontá ku un dilema si nan mester rekomendá implementashon di un shòt di refuerso òf warda algun luna pa tur pais logra bakuná un mínimo di 10% di nan poblashon promé.

Funshonarionan di Organisashon Mundial di Salú (WHO) ta di opinion ku por utilisá e bakunanan disponibel mihó pa bakuná personanan di riesgo haltu na paisnan di ménos rekurso ku aun no a logra risibí sufisiente bakuna pa nan poblashon.

Di otro banda, outoridatnan i funshonarionan di salú na paisnan ku ya a bakuná un parti grandi di nan poblashon ta di opinion ku mester reservá e dósisnan di bakuna pa personanan ku un sistema inmunológiko vulnerabel ku ta den nesesidat di un ékstra shòt komo refuerso pa yuda protehá kontra e vírus di Covid-19.

Funshonarionan na Merka ya a kuminsá desaroyá un plan pa implementá un terser shòt di e bakunanan di Pfizer i Moderna pa mas tardá hèrfst. Argumento pa esaki ta ku e logístika ta demasiado kompliká pa warda riba prueba sientífiko riba nesesidat di un shòt adishonal.

Investigashon sientífiko a demonstrá ku te ainda bakunashon kompletu ta sumamente efektivo pa protehá kontra enfermedat severo, hospitalisashon i morto kousá pa e vírus di Covid-19. Ademas, no tin prueba aun ku un èkstra shòt di bakuna ta nesesario ni na ki momentu. Sinembargo, algun marka di bakuna ta rekerí refuerso pa por keda brinda protekshon na nivel haltu.

Banda di Merka, algun otro pais inkluso Fransia, Alemania i Israel ya a outorisá un terser shòt di refuerso pa personanan vulnerabel.

Ofisialnan di WHO ta fuertemente kontra pa implementá un “booster” shòt na e momentunan aki, debí ku esaki lo deprivá paisnan di ménos rekurso aun mas pa por yega na bakuna ku nan mester di dje desesperadamente. Ademas, WHO ta informá ku gran parti di e poblashon mundial ku no ta bakuná tin konsekuensia fatal pa mundu henter. Mirando ku un tasa abou di bakunashon riba nivel mundial ta duna e vírus un posibilidat enorme pa mutua i desaroyá variantenan potensialmente más kontagioso i mas peligroso.

E distribushon mundial di bakuna ta diferensiá inmensamente entre paisnan relativamente riku i paisnan di ménos rekurso. Mayoria pais na Nort Amerika i Oropa ya a bakuná mas ku mitar di nan poblashon ku un mínimo di un shòt. Sinembargo, apenas 4% di e poblashon na Afrika a risibí un mínimo di un shòt di bakuna, esaki segun datos di Our World Data publiká pa Universidat di Oxford.

Den un konferensha di prensa ku a tuma lugá na komienso di luna direktor general di WHO, Dr. Tedros Adhanom Ghebreyesus, a pidi pa tur pais wanta un ratu ku implementashon di un èkstra shòt di bakuna te ora ku tur pais logra yega e ophetivo mínimo di 10% di nan poblashon bakuná.

Login