Montaña–Botika Montaña Nobo huntu ku un sentro médiko ta habri su portanan. Esaki ta un invershon den tempunan difísil; pero tambe ku un bista pa futuro. Esaki ta presisamente e motibu tras di e eskoho pa un edifisio moderno ku un sentro médiko.

E lokashon ta igual ku esun di èks botika “Montaña Abou,” riba un tereno habrí den e bario kaminda e bunita plan di gobièrnu ta eksistí pa kasnan di ansiano, stashon di ambulans i diferente otro fasilidatnan pa nos grandinan.  Botika di Servisio a skohe un edifisio moderno pa Montaña Abou paso nan tim di maneho ta kere ku un edifisio bunita i progresivo ta yuda duna aun mas bunitesa na e bario i lo wòrdu apresiá dor di pashèntnan i klientenan.

Ku un presupuesto chikitu i ku yudansa, nan a logra renobá e edifisio antiguo. Botika di Servisio ta kere den modernisashon i invershon den kalidat espesialmente durante e periodo aki. E nòmber “Botika Montaña Nobo” ta indiká ku Botika di Servisio ke kue un rumbo nobo pa ku e lokashon aki; un botika ku ta ofresé bon servisio, produktonan pagabel, i ta bringa pa nunka bende “no” na nos klientenan.  Ku un surtido grandi di remedi, un botika espasioso i bunita, Botika di Servisio ta spera di por atraé otro aktividatnan pa Montaña Abou; kuminsando ku un sentro médiko banda di e botika, kaminda Dr. Yves Schoop ta situá i tambe un filial di Medical Laboratory Services.

Aparte di esakinan, ainda a sobra espasio pa 1-2 profeshonal den área médiko manera dietista, sikólogo o fisioterapista. Montaña Abou ta un distrito grandi kaminda invershon i fasilidatnan nobo tur ta bon biní. Botika Montaña Abou i e sentro médiko ta pas perfektamente, i ta trese fasilidatnan médiko pa e populashon serkano, mei mei di e distrikto.