WILLEMSTAD – ‘Mel’ Simmons i Eugene Angelica a aserká Fundashon Marshe i tambe Parlamento komo konsehero sosial/komun di esnan ku ta empleá i/òf ta establesé den Plasa Rondó, basá riba un palabrashon ku nan tin ku Fundashon Marshe.

E fundashon ta pone e empresarionan lomba kant’i muraya i p’esei nan ke sa dje fundashon pa medio di Parlamento, dikon nan tin di paga èkstra pa dianan di fiesta den plasa.  Nan ta enfatisá ku Plasa Rondó ta di pueblo. Ku otro palabra, plasa ta tambe di esnan ku ta lora man den plasa. Simmons i Angelica ta mustra den nan karta riba artíkulo 1, insiso 2b di Areglo Laboral (“Arbeidsregeling 2000”) pa loke ta labor di e hendenan akí. Nan ke sa partikularmente dikon nan tin di paga pa Fiesta di Rei djasabra awó, ‘miéntras ku Rei a duna liber na henter Reino pa tur siudadano ku tin algu di bende segundo mano por hasi esaki riba kaya tambe i gratuitamente, pero na un manera organisá i ordènt’.

“Komo ku na nòmber di e trahadónan inskribí ya nos a hasi dos intento pa un reunion sin ku nos a haña un sita, nos ta manda un kopia di e karta akí pa gobièrnu, ku e petishon pa di tur manera gobièrnu anunsiá i splika tur esnan ‘ku ta kobra nos pueblo’, pa nan por selebrá Fiesta di Reina riba kaya i den lokalidatnan públiko di benta i kompra di artíkulonan segundo mano, ku e kobramentu ta kontra di dekreto di Rei. E ta prohibí i ku gobièrnu lo kontrolá debidamente.”

Segun Simmons i Angelica, e trahadónan ku ta pasa nan dia den Plasa, ta spera tambe ku pronto gobièrnu lo haña solushon adekuá pa nan problema, di manera ku nan ‘por konta’ ku un entrada sosial/mínimo di gobièrnu, durante e periodo ku Marshe lo ta será, manera nan tin na e momentu akí. “Esaki ta un motibu mas dikon gobièrnu ya mester a deklará e Maneho di Merkado Laboral funshonal.”