Bringamentu ta finalisá den asesinato na Marí Pampoen

April 5, 2024 • 2 minüt pa lesa

Víktima ku ayera den oranan di anochi a keda asesiná.

Willemstad, — Polis di Punda ayera den oranan di anochi a keda dirigí ku urgensia pa e bario di Marí Pampoen pa ta mas eksakto Pampanostraat pa un hòmber na suela ku herida di bala ku tabata den un situashon basta delikado.

*Pampanostraat unda kaso di asesinato a tuma lugá.*

Ayera un biaha mas Polis mester a bai Pampanostraat pa otro kaso di asesinato unda un hòmber a bin pèrdè su bida. Tabata na aña 2022 ku polis mester a bai e mesun kaya aki pa un kaso di asesinato unda un hòmber a keda asesiná despues ku un vehíkulo a yega i e shofùr a baha los tirunan den su direkshon ku a resultá fatal. Ayera un biaha mas Polis mester a bai netamente e kaya aki pa otro kaso di asesinato.

https://www.facebook.com/share/v/CxeyLiDKzFigNcVs/?mibextid=oFDknk (klik riba link pa wak e vidio)

*Di e forma aki a bin topa ku e víktima drumi kantu di kaminda mortalmente heridá pa bala.*

Tabata djaweps 4 di aprel 2024 alrededor di 19.01’or di anochi, Sentral di Polis a risibí informashon di un kaso di tiramentu ku a tuma lugá den Pampanostraat. E unidat polisial ku a presentá na e sitio, a bin topa ku un hòmber drumí abou ku herida di bala den un situashon krítiko. E víktima ku tabata bisti na un karson blou largu ku flanèl blanku i slòf na pia tabata drumi pechu ariba ku herida di bala na e parti ariba di su kurpa.

*Personal di ambulans tratando na reanimá e víktima pero sin resultado deseá.*

For di investigashon preliminar ku polis a hasi na e sitio, a sali na kla ku despues di un diskushon entre e víktima i un hòmber, a surgi un bringamentu. Despues e hòmber akí a lòs algun tiru dirigí riba e víktima ku a alkanse na altura di su pechu i tambe kabes. Despues di su akto e hòmber akí lo a hui bai. Ambulans a yega rápido na e sitio pero no por a hasi nada mas pa e víktima. Polis mesora a sera e aria pa asina e Tim Forensiko I demas outoridatnan por a hasi nan investigashon.

*Yegada di Fiskal di Ministerio Públiko pa asina pone su mes na altura di e situashon.*

Na final dòkter di polis a konstatá morto di e víktima i riba órden di un fiskal di Ministerio Públiko a konfiská e kurpa sin bida pa asina por a hasí outopsia riba esaki. Presente nan a indiká ku ta trata di e konosido Koko man ku tabata bende Koko kantu di kaminda na Marí Pampoen. Debí ku no a notifiká famia ainda, no por duna nòmber di e víktima liber. Vigilante ta ekstendé palabranan di kondolensia na famia di e víktima ku pèrdida di nan ser kerí.