WILLEMSTAD, — Segun karta di minister Larmonie-Cecilia un büró di trabou lo yuda ku e rebaho struktural di kobradónan di ònderstant.

Minister Larmonie-Cecilia ta informá ku un büró di trabou lo yuda ku e rebaho struktural di kobradónan di ònderstant. Un büró di trabou lo tin e funshonal prinsipal pa guia personanan ku ta kobra ònderstant i òf a pèrdè trabou na un trabou nobo. E büró mester ta responsabel pa registrá i kòpel vakaturanan i personanan ku ta buska trabou. Segun lei AB 2009 no. 135, art. 13 kobradónan di ònderstant tin e obligashon pa buska trabou. Minister Larmonie-Cecilia den su karta na parlamento ta bisa ku mester stimulá proyektonan den kual tin trabounan ku ta útil pa sosiedat. Pero pa kobradónan di ònderstant haña e trabou mester tin trabou tambe.

Trabounan ku ta útil pa sosiedat tambe ta regla den lei art. 13 di Bijstandwet. Esakinan por ta entre otro trahadó di limpiesa, sosten den enseñansa, i tambe sosten den e sektor di kuido. E büró di trabou aki mester traha konhunto ku e instansia ku ta duna ònderstant pa asina kontrolá kuantu persona ta drenta den e sistema di ònderstant i kuantu ta sali for di e sistema pa un trabou. Paso al final e meta ta pa redusí kobradó di ònderstant i yuda personanan ku trabou. Gobièrnu tin e obligashon pa krea e trabounan pa saka kobradónan di ònderstant for di e sistema di ònderstant. Segun Larmonie-Cecilia Reda Sosial, lo por nifiká algu den kuadro di trabou ya komo e organisashon tin eksperiensha ku proyektonan sosial i ta risibí supsidio si gobièrnu i tambe di fondonan di desaroyo di Hulanda.

Anteriormente den un reunion di parlamento David Seferina di frakshon MKF,  a menshoná ku kobradónan di ònderstant ta bahando tiki tiki, pero ku esaki mester baha un tiki mas tantu pa asina ministerio di SOAW por atenshon na hopi mas prioridat na proyektonan òf aktividat ku ta kai bou di e ministerio. Segun Seferina mester redusí personanan ku ta kobra ònderstant ya komo esaki ta kosta gobièrnu sèn. David Seferina a kompartí ku e ta kòrda den presupuesto di aña pasa, ku 33 mion ta bai na pagamentu di personanan ku ta den ònderstant. E parlamentario ta kompartí ku e ta kere ku via di e banko di vakatura i invershon den esaki por sondia posibilidatnan pa personanan ku ta kobra ònderstant pa bai traha. 

Parlamentario Ana Maria Pauletta (PAR) a kompartí ku e ta risibí pregunta frekuentemente dikon no ta krea trabou den tene pais limpi. E parlamentario ta menshoná ku tin 14% di desempleo bou di adulto i alrededor di 6000 persona ku ta kobra ònderstant. Ana- Maria Pauletta (PAR) a kompartí anteriormente ku SOAW a yega di inisiá diferente trayekto di trabou, den horeka, den resiklahe, i ta bale la pena investigá e posibilidat pa krea un área di trabou nobo.