Punda,– E debate di parlamento tokante e situashon prekupante di FKP a trese algun punto interesante dilanti ayera den oranan di mainta bai kue mèrdia.

Parlamento a tene un reunion relashoná ku e situashon aktual di FKP. E reunion di parlamento a keda yamá dor di miembro di frakshon di PAR, Anna-Maria Pauletta. Ta asina ku e reunion tabata tin komo meta pa deliberá ku Minister di VVRP, Charles Cooper, i huntu ku gerensha di FKP tokante e desaroyo prekupante na FKP.

Diferente parlamentario a risibí e oportunidat pa duna nan disertashon i pa asina pidi tantu e gerensia di FKP komo minister Cooper dokumentashon nan pa duna un mihó bista tokante e situashon aktual di FKP.

Durante e disertashon di Martines, e parlamentario a buta e énfasis riba e importansha sosial ku FKP tin riba e komunidat. Segun Martines, FKP i gobièrnu a firma un akuerdo di maneho kaminda e akuerdo aki a bin vense kaminda diferente punto no a keda ehekutá. Martines mesora a puntra ki konsekuensha por tin riba FKP a akaso no sigui funshoná ku un akuerdo di maneho.

Mas aleu, Loo a pidi pa duna un resumen tokante tur e trabounan di konstrukshon ku FKP ta ehekutando aktualemente. I mesora Loo a pidi pa analisá i wak si FKP ta risibiendo nan pèrmitnan pa konstrukshon. Segun parlamentario Martines, tantu bal destiná vários tereno pa FKP, pero e fundashon no ta risibí su pèrmitnan pa inisiá trabounan di konstrukshon.

Na final di parlamentario Martines su disertashon, e parlamentario a indiká ku frakshon di KEM ta prekupá ku e struktura aktual ku FKP ta trahando bou di dje. Segun Loo, FKP ta trahando bou di dos ministerio, kual ta ministerio di VVRP i ministerio di SOAW. E parlamentario a sigui splika ku, apesar ku e dos ministerionan ta hasi lo máksimo pa traha huntu, e konstrukshon aki ta destiná pa krea konflikto. Loo ta sigui splika ku den kasonan ku konflikto, úniko persona ku ta pèrdè ta e pueblo di Kòrsou. Basá riba e opservashon di Loo, e parlamentario di partido KEM ta puntra si a evaluá kaba pa laga FKP operá solamente bou di 1 ministerio.

For di e opservashon di Loo insinuando ku e echo ku FKP ta kai bou di dos ministerio por kousa burokrasia i asina afektá operashon di FKP, minister Cooper a reakshoná indikando ku diferente pregunta di Loo, e no por duna kontesta debí ku esaki ta kai bou di Minister di SOAW, Ruthmilda Larmonie-Cecilia. Segun Cooper, preguntanan manera akuerdo di maneho i supsidio di hür ta kontestanan di SOAW pues e no por duna kontesta riba esaki. Tambe e minister di VVRP, Charles Cooper, a rekomendá pa wak di Larmonie-Cecilia por djòin e reunion mirando ku e reunion tabata mishi ku diferente tópiko sosial.

Basá riba e rekomendashon di minister Cooper indikando pa invitá e minister di SOAW, mesora Loo Martines a tuma e oportunidat pa pidi otro miembronan di parlamento pa invitá minister Larmonie-Cecilia.

Mirando ku otro miembronan di parlamento tambe a bai di akuerdo ku e rekomendashon di Minister Cooper, minister di SOAW, Ruthmilda Larmonie-Cecilia, a presentá den sala di parlamento.