AMSTELVEEN—Kompania di ouditoria KPMG a haña un but di 25 mion dòler (23 mion euro) di e supervisor merikano pa ouditornan.

Public Company Accounting Oversight Board (PCAOB) a determiná ku trahadónan di KPMG a hasi froude ku pruebanan interno obligatorio. Ta trata di e but mas haltu ku e supervisor a yega di impone den Merka. Sientos di personal a komete froude ku prueba di konosementu anual. Ekstra doloroso tabata e kontroversia di eks-minister Roger van Boxtel, ku a renunsia komo komisario di e multinashonal di konseho i ouditoria. Pa motibu di e skandal e direktor Marc Hogeboom tambe a tuma retiro. KPMG ta kai bou di supervishon di e supervisor PCAOB pasobra e kompania ta kontrolá kuentanan anual di algun kompania hulandes ku ta riba bolssa di balor na Merka. E supervisor ta traha den estrecho koperashon ku supervisor hulandes AFM (Autoriteit Financiele Markten). Minimo 5 aña a konstatá froude serka KPMG ku e pruebanan di konosementu. E pruebanan ta nesesario pa mantene konosementu i abilidatnan profeshonal i a keda krea pa drecha reputashon di ouditornan despues di varios eskandalo grandi. Segun e supervisor merikano tabatin un kultura den KPMG kaminda tabata permiti froude di eksamen riba gran eskala pa largu tempu. Asina a tacha e konfiansa den e profeshon di accountant, ku ta esensial pa e profeshon. KPMG ta un kompania di konseho i ouditoria ku ta opera internashonalmente den mas ku 140 pais, ku sede prinsipal den Amstelveen.