AMSTERDAM—Kompania di aviashon Transavia a haña un but di 46.000 euro di Inspekshon hulandes pa uso di 60 stagiaire komo trahadó permanente.

E studiantenan tin derecho awor riba salario i kompensashon ku forsa retroaktivo. Esaki ta kosta e kompania un total di 623.000 euro. Inspekshon a start aña pasa ku un investigashon riba Transavia despues di varios melding a drenta. For di e investigashon a resultá ku un total di 60 studiante di 5 instituto di mbo a haña trato inhustu. Transavia a spera un but kaba i un bosero a splika ku ya a kumpli ku esaki. Nos a tuma nota di e rapòrt i lo profundisá den esaki, segun e bosero. E investigashon ta fokus riba studiantenan ku a kore stage entre februari pa yuni 2022 na Transavia. Nan a haña mesun tareanan ku un personal di kabina i tabatin mesun skema. Segun Inspekshon tabatin un relashon di trabou i e studiantenan a keda pagá di menos. Inspekshon di Labor tin kombersashonnan ku varios institutonan di enseñansa i Inspekshon di Enseñansa. Esaki inspekshon a hasi pa ta bon kla ku e aspekto di entrenamentu ta sentral. Inspekshon a enfatisá ku kompanianan no por usa studiantenan komo trahadó.