WILLEMSTAD – Parlamentario Rennox Calmes a entregá un petishon pa un ‘ora di pregunta’ (vragenuur) na Presidente di Parlamento Charetti America-Francisca. E no a spesifiká ta kua Minister e ke pa invitá na e reunion spesial akí, pero por komprondé for di e preguntanan ku ta preguntanan dirigí na Minister di Hustisia Shalten Hato. Calmes a entregá 15 pregunta tokante overtaim den Kuerpo Polisial (KPC).

E ke sa kuantu ta e montante ku Minister mester kòrta den overtaim di polis i den kua pòst di presupuesto por mira esaki. “Kiko ta e motibunan ku Minister mester kòrta den overtaim di polis? Kiko kòrtamentu akí ta nifiká den maneho di Kuerpo Polisial i e servisio ku pueblo ta spera di polis? Kòrta den overtaim di polis representá solushon pa kiko? Kuantu sèn pa overtaim polis a kosta komunidat último 10 añanan? Kiko ta e motibunan ku polis ta traha hopi overtime? Kuantu polis tin aktualmente? Kuantu polis mester tin aktualmente? Kua investigashon ta bisa esaki?”

Tambe e ke sa kon leu ta ku posishon hurídiko nobo i areglo polisial nobo di polis. I si a laga midi e produkto final (formashon básiko di polis) ku e skol di polis Opleidingsinstituut Rechtshandhaving & Rechtshandhaving (ORV) ta entregá na KPC si e ta kuadra ku KPC si espektativa, pues e polis. E ke sa for di ki tempu i kiko e resultado ta. Tambe e ke saa si a laga midi e espektativa di KPC ta kuadra ku esun ku pueblo tin di KPC. I for di ki tempu e midimentu akí a tuma lugá. Ademas Calmes ke sa for di kua investigashon òf dokumentashon òf di unda a konkluí ku kòrta den overtaim di polis ta un solushon. Anto solushon pa kiko. “Tin fondo pa reklutá mas polis? For di kua pòst riba presupuesto por mira esaki? Di kuantu klas di polis nos ta papia pa aña 2023? Ta bai mantené dormashon polisial na 3 aña?” Calmes ke un splikashon.

E ‘ora di pregunta’ ta un inovashon reglá den artíkulo 96a di e Reglamento di Orden di Parlamento, ku ta hasi posibel ku por yama un Minister pa bin kontestá preguntanan por eskrito den un reunion den sala di Parlamento. E posibilidat di ‘vragenuur’ i ademas ‘interrupties’, esta ku por interumpí un kolega den Parlamento na palabra, a drenta na vigor na febrüari, despues ku a adaptá e Reglamento di Orden. E Minister na kua a hasi pregunta lo kontestá esakinan den un reunion spesial pa kua no mester di kuórum, manera ta e kaso ku tur otro reunionnan di Parlamento.

E reunion por start manera ku esun ku a hasi e preguntanan i e Minister ku mester kontestá, ta presente den sala. Na kuminsamentu di e reunion e Parlamentario ku a hasi e pregunta ta haña e oportunidat pa duna un splikashon mas amplio tokante su preguntanan, pa despues e Minister kontestá. Ora ku e Minister kaba di kontestá, e Parlamentario en kuestion ta haña algun minüt kòrtiku mas pa hasi pregunta adishonal. I si e Minister kontestá e preguntanan akí tambe, e ora ei tur Parlamentario presente ta haña 2 minüt pa nan tambe hasi pregunta tokante e mesun tema. Ora e Minister kaba di kontestá e preguntanan ei, e ora ei e ‘vragenuur’ a kaba. Manera e nòmber ta bisa kaba e momento di pregunta akí mester dura máksimalmente un ora, pero Presidente di Parlamento tin e oportunidat pa prolongá esaki ku 15 minüt si ta nesesario.

Ya tres Parlamentario a hasi uso dje inovashon akí. Parlamentario Ana Maria Pauletta di frakshon di PAR, a pidi pa invitá Minister di Finansa Javier Silvania pa splika Parlamento mas tokante Restrukturashon sektor di kuido di salú mental (GGZ). Pauletta a pidi e ora di momentu, ya ku e liña di tempu di e dokumento ‘Visiedocument Geestelijke Gezondheidszorg 2019-2023’ (VVGz) ta finalisá e aña akí. Teniendo kuenta ku kuido di salú mental ta un parti importante i esensial den e sistema di kuido di salú general, e ke sa di Silvania si e tin intenshon di prolongá e dokumento. Ela hasi uso di e inovashon di por hasi pregunta por eskrito na un Minister, ku lo bai Parlamento personal dia 6 di aprel awó pa kontestá esakinan.

Pero e Presidente a rechasá e petishon di Parlamentario Zita Jesus-Leito di Frakshon di PAR tokante desempleo na Kòrsou, ku Minister di Desaroyo Sosial, Labor i Bienestar (SOAW) Ruthmilda Larmonie-Cecilia. Por eskrito ela inform’é ku e motibu di esaki ta ku e tema no ta aktual.