Kaya Palomba: djárason 7 di febrüari 2023 alrededor di 13.06’or di atardi, Sentral di Polis a risibí informashon di un kaso di tiramentu.

Nieuwe Haven—E asesinato ku a tuma lugá den oranan di mèrdia riba Kaminda Palomba 7 di febrüari último, no tabata nesesario. Esei ta lokual e hòmber akusá di a asesiná C. Maduro di 67 aña, a splika na korte ayera.

Korte di Hustisia den Promé Instansha, ayera trata e kaso di Ministerio Públiko kontra di Robert August Cannister, nase na Kòrsou riba 3 di ougùstùs 1959. Cannister ta akusá di a mata Maduro riba 7 di febrüari último, despues di un diskushon den oranan tempran di mèrdia. Cannister a splika hues mr. Snitker, ku ta un situashon ku a sali kompletamente for di man, sin tabata mester. Korte a trata e kaso ayera den forma preliminar sin bai den kontenido. Te ainda, ta indikativo ku tabata trata di un diskushon riba kuenta òf debe na Aqualectra. Su abogado, mr. Dickens ayera a súplika libertat pa su kliente, debí ku e temporada pa su aresto preventivo a vense, sin ku Ministerio Públiko a súplika prolongashon di su 30 dianan na tempu. Riba e súplika di abogado mr. Dickens, hues ta konkluí ku Ministerio Públiko no tabatin rason di tin argumentunan legítimo pa sigui tene Cannister, pero den e kaso aki ta trata di apénas 1 ora den diferensha i mirando e hecho, e hues no a haña apto pa laga Cannister liber. E kaso ta sigui riba 30 di Ougùstùs próksimo.

Tabata djárason 7 di febrüari 2023 alrededor di 13.06’or di atardi, Sentral di Polis a risibí informashon di un kaso di tiramentu ku a tuma lugá na Kaminda Palomba. Un unidat polisial a keda dirigí na e sitio i na su yegada el a bin enkontrá ku un hòmber drumí abou den kura di un kas den e kaya ariba menshoná  i ku no tabata duna señal di bida. For di investigashon preliminar a sali na kla ku despues di un diskushon den e kaya ariba menshoná unda asta tabatin tiramentu di piedra riba otro , un hòmber a lòs algun tiru dirigí riba e víktima. Ta trata aki di dos hòmber di edat ku tabatin un diskushon fuerte kontra otro.  Tabata trata di un problema familiar.

E víktima a risibí bala na e parti ariba di su kurpa i a keda mortalmente herida atras den e kura di kas. Ambulans a yega rápido na e sitio pero no por a hasi nada mas pa e víktima. Alrededor di 13.45’or dòkter di polis a konstatá morto. Ta trata di e víktima kual  a keda identifiká komo Cedric Engelberto Maduro, nasé na Kòrsou di 69 aña di edat. Na e sitio polis a haña i konfiská un arma di kandela i algun kashi di bala i a detené e hòmber Cannister, di 64 aña nasé di na Kòrsou, ku a atmití ku e ta kulpabel pa e kaso ariba menshoná. Ta sospechá ku e tirunan fatal a kuminsá 12.45 pm.