Barku Miranda

Bahia Santa Ann – Ku intervenshon di Curaçao Sail Foundation (CSF), pa fin di luna e barku di tres master Uruguayano V/E Capitán Miranda ta ripití un bishita di kuater dia na Kòrsou.

Pa e bishita aki, ku ta kuminsá djabièrnè dia 28 aprel, ta trahando un programa, den kua aparte di e aktividatnan regular ta invitá sierto skol pa riba e promé dia subi bordo i kaminda ta krea oportinidat pa e públiko grandi tambe bin tira un bista riba e barku riba djasabra 29 di aprel, djadumingu 30 di aprel i djaluna 1 di mei di 10 or di mainta pa 6 or di atardi. Pronto lo anunsiá unda e barku ta bai mara.

Na 1930 a konstruí i inougurá Capitán Miranda na Cadiz, Spaña, i el a kuminsá su karera komo barku di karga. E ta nombrá pa e hidrógrafo Uruguayano kapitan Francisco Miranda (1868-1925) ku a sirbi Uruguay komo ofisial di gabinete, sekretario di guera i despues komo profesor di geografia marítimo na e Akademia di Marina di Uruguay. Te 1978 a usa Capitán Miranda komo barku pa hasi investigashon hidrográfiko. Despues el a pasa den un transformashon grandi spesífikamente pa formashon di nabegashon ku bela di marina di Uruguay. E ta brinda espasio pa un tripulashon fiho di alrededor di 30 hòmber i muhé ku ta den formashon pa bira ofisial di marina i ku mester siña pa biba i traha riba e barku di bela aki. E barku ta 64 meter largu i 32.40 meter haltu, i e tin un profundidat di 4 meter.

E barku a bini Kòrsou na mas ku un okashon. Por ehèmpel, na fin di yüni i inisio di yüli 2019 el a bini Kòrsou rondó di Dia di Bandera. Aña pasá Capitán Miranda tabata partísipe na e regata Velas Latinoamérica 2022 kaminda a skohe Kòrsou komo haf di anfitrion di 7 pa 12 di yüni. Hustamente pa e rekuerdonan plasentero, marina di Uruguay a aserká CSF pa por bini atrobe na aprel e aña aki. Despues di Kòrsou e itinerario ta sigui pa Merka, siguí pa Europa kaminda na fin di yüni e barku ta partisipá na Sail Den Helder 2023 na Hulanda.