Segun Silvania, e dos ministerionan bou di su maneho, Salubridat Públiko i di Finansas a krea un solushon pa e défisit di likides agudo di Klínika Capriles.

Kwartier- Trahadónan di Klínika Capriles ta haña indeksashon. Esei ta lokual por konkluí for di un komunikado publiká pa Minister Javier Silvania riba su retnan sosial.

Aktualmente Klínika Capriles ta den problema finansiero grandi. Klínika Capriles no ta den kondishon pa kumpli ku tur su obligashonnan finansiero, entre otro, pa motibu di e struktura di tarifa no aktualisá di kuido di salú mental. Na 2021 Outoridat di Kuido di Kòrsou a hasi un investigashon riba e struktura di tarifanan di kuido salú mental di Klínika Capriles. For di e investigashon aki a sali na kla ku e struktura di tarifa aktual, manteniendo gastunan di kuido konstante, lo krea un défisit anual di máksimo 4.7 mion florin.

Aparte di esaki, pa motibu di e problemanan finansiero persistente di Klínika Capriles a surgi un retraso di 2.7 mion florin den mantenshon di e edifisionan, remplaso di e inventarionan kibrá i aktualisashon di e infrastruktura di ICT. Segun Silvania, Ministerio di GMN ta trahando riba implementashon di e Dokumento di Vishon di Kuido di Salú Mental i tambe riba un investigashon pa un struktura nobo di tarifa pa kuido di salú mental na Kòrsou. Implementashon di e Dokumento di Vishon di Kuido di Salú Mental ta enserá restrukturashon di e dunamentu di kuido i eventualmente reorganisashon di e dunadónan di kuido, inkluyendo Klínika Capriles, ku e meta pa mehorá servisio i baha gastunan.

E implementashon di e mehorashonnan den kuido di salú mental i finalisashon di e investigashon riba tarifanan i seguidamente e implementashon di un struktura nobo di tarifa lo tuma su tempu. Previo na e implementashon di e mehorashonnan i e struktura nobo di tarifa, Gobièrnu i Klínika Capriles a yega na un akuerdo di sosten finansiero den forma di un forskòt di 3.9 mion florin, ku ta konsistí di: 1. 1.2 mion florin pa e défisit relashoná ku e struktura bieu di tarifa pa e di 4 kuartal di 2022, loke ta 1 kuart di e défisit máksimo di 4.7 mion florin riba un base anual. 2. 2.7 mion florin pa e retraso ku a surgi den mantenshon di edifisionan, remplaso di inventarionan kibrá i aktualisashon di infrastruktura di ICT.

Transhenan di forskòt i kondishonnan: Pa e kompensashon di e gastunan, a akordá lo siguiente ku e maneho di Klínika Capriles, i esaki a wòrdu aprobá dia 5 di aprel 2023 pa Konseho di Minister. Pa determiná e transhenan di pago a tene kuenta ku e investigashonnan ku Outoridat di Kuido di Kòrsou a hasi na 2020 i 2021. Gobièrnu a pone e siguiente kondishonnan pa pago di e transhenan di forskòt: 1. Durante di aña 2023 lo paga tur salario inkluyendo indeksashon. 2. Durante di 2023 no por para kuido di salú mental. 3. Durante di aña 2023 ta kumpli ku tur obligashon fiskal. 4. Por usa e forskòtnan solamente pa paga gastunan di kuido di salú mental nesesario. 5. Maneho di Klínika Capriles ta manehá kasonan di korte. 6. Uso di e forskòtnan duná lo wòrdu kontrolá adelantá di akuerdo ku e akuerdo ku tin ku maneho di CMC. 7. Klínika Capriles mester entregá lista di kreditornan na Ministerio di Finansa mensualmente.  8. Klínika Capriles ta manda un pronóstiko di likides di 2023 mensualmente pa dia 30 di e siguiente luna na Ministerio di Finansa. Esaki mester ilustrá tantu e pronóstiko di e realisashon di e luna ei inkluyendo un splikashon di e diferensia. E pronóstiko di likides aktualisá lo no tin efekto riba e forskòt máksimo di 3.9 mion florin. 9. Klínika Capriles ta kontribuí aktivamente na deliberashonnan tokante di dunamentu di kuido den kuadro di e Dokumento di Vishon di GGZ di Ministerio di GMN.  10. E tarifanan aprobá ta wòrdu apliká pa e dunamentu nobo di kuido establesí. Durante di e transishon lo tin mester di un suma máksimo di 4.7 mion florin, ku lo wòrdu determiná a base di e gastunan real. Si yega na un akuerdo entre GMN, SVB i Klínika Capriles, lo pone e suma di 4.7 mion florin disponibel via di SVB. 11. Previo riba e pago di e transhenan di forskòt, e resolushon aki, e transhenan i kondishonnan menshoná lo wòrdu establesí por eskrito i firmá pa ámbos partido.