Presidente Cft, Lidewijde Ongering.

Otrobanda—E Komishon pa Supervishon Finansiero, a atmití ku te ainda, e kálkulonan riba daño okashoná na Ennia, no ta asertá pa un aktuario. Aló ménos, na Kòrsou e komishon no a mira niun kalkulo di Banko Sentral, konfirmá pa n aktuario.

Esei ta lokual un funshonario di Cft, sintá den sala durante un rueda di prensa 28 di febrüari último a konfirmá. Presidente di Cft, Lidewijde Ongering tampoko no tabata por a duna kontesta riba e pregunta, pa kual e la referí na un funshonario di Cft enkargá ku e.o. Ennia Caribe Holding.  E funshonario a sakudí su kabes, konfirmando ku na Kòrsou te ainda, Banko Sentral/Ennia no a presentá un kalkulo aktuario na Cft. E kalkulo di un akuario ta e úniko èrmènt atministrativo pa konfirmá e daño na solbabilidat di Ennia Caribe Leven. E kontesta negativo di parti di Cft, ta konfirmá finalmente ku Banko Sentral, no ta suministrando informashon korekto.

Entretantu ta birando opvio ku e  proposishon hibrido riba solushon di Ennia ta un movementu hostil pa toma di e kompania mediante un atkishon inboluntario, ku den práktika por resultá robes, si no konsiderá e konsekuenshanan. Aparte di esei, e solushon ta proponé un alternativa sin menshoná kuantu aktivo di Ennia Caribe Holding te ainda ta rekuperá, ku segun informashon presentá den korte ta por lo ménos 700 mion florin.

Si en bèrdat a rekuperá 700 mion florin òf mas for di e lokual Ennia Caribe i Banko Sentral ta menshoná na 1.2 miar florin ta keda 500 mion florin na daño. Korte entretantu a ordená Ansary i kompania na paga alrededor di 260 mion florin bek. Ta keda 240 mion florin kuestioná ainda, for di e 1.2 mira florin, lokual Banko Sentral a menshoná na daño, sin tabatin un kalkulo aktuario. Si resultá ku e daño na solbabilidat no ta 1.2 miar sino ménos, Kòrsou no tin niun motibu pa paga 30 mion florin durante 30 aña.