Awor ke pa gobièrnu di Venezuela limpia Lago de Maracaibo pa karga mas krudo

WILLEMSTAD – E úniko empresa estadounidense ku ta aktualmente outorisá pa hasi negoshi den Venezuela, a urgi gobièrnu dje pais pa limpia e ‘sendiment’, esta e material ku a senk bai den fondo di Lago de Maracaibo, pa por karga mas krudo den e tankinan sin kore riesgo den pega den e fondo.

Manera Vigilante a komprondé nan ta hasi interkambio di krudo riba laman sin yega e terminal di Bullenbaai, pasó Kòrsou tin un kontrakt será ku e kompania Caribbean Petroleum Refinery.

Segun Bloomberg, e limpiesa kasi lo dupliká e kantidat di krudo ku e empresa lo por eksportá. Pa awor akí, Chevron a paga pa midi e kantidat dje ‘sendiment’ akumulá den fondo dje lago. Si limpia e lago, Chevron lo por karga te ku 400 mil barí di krudo den su tankinan, for di e kantidat máksimo aktual di 250 mil barí. E kompania, ku a kuminsá manda krudo venezolano pa eksterior na yanüari, lo suministrá e refinerianan na Estadonan Uní.

E krudo pisá di Venezuela ta balorá pa e refinerianan di Kosta di Golfo ku te resientemente tabata buska e gradonan pisá di Rusia pa remplasá esaki. Na desèmber a sali e informe ku vários refineria tabata purba haña poseshon dje krudo inusual di Venezuela. E gobièrnu di Biden a suavisá e sanshonnan kontra Venezuela, pa pèrmití Chevron reanudá su trabou den Venezuela ora ku a sanshonnan nobo a sera e akseso na krudo pisá ruso.

Na novèmber, e gobièrnu a otorgá Chevron un lisensia di 6 luna pa operá den Venezuela bou di su empresanan konhunto ku PDVSA aya. E ganashinan di benta di krudo derivá di Venezuela di Chevron lo ta destiná pa paga e debe serka Chevron i lo no impulsá e ganashinan di PDVSA.

Luna pasá, Chevron a manda krudo for di Venezuela na un tarifa di 100 mil bpd, eksportando alrededor di 3 mion di barí pa e luna ei. Awó otro kompanianna tambe ta eksigiendo lisensianan pa operá den Venezuela i esei ta inkluí kompanianan no estadounidense manera esun europeo Repsol i Eni, di kua tur tin debenan pendiente ku e kompania petrolero estata di Venezuela.