Ramon Chong.

NIEUWE HAVEN—Segun eks presidente di Partido Nashonal di Pueblo, Ramon Chong, apénas dos dia despues di a tuma su retiro for di Nashonal, MFK a aserk’é pa bira presidente di nan partido polítiko. Esaki ta lokual e la duna di konosé djamars atardi den Korte di Hustisia, dilanti hues mr. Otto Nijhuis.

Chong a entamá un wisio sivil pa súplika korte na ordená un evaluashon nobo riba su kandidatura komo minister. Chong ke pa korte ordená pa eliminá e desishon di keda sin presente komo kandidato, pasobra durante su prome evaluashon Prokurador General a duna konseho robes. Segun Chong, e tin un karta tambe unda Prokurador General ta ekstendé su diskulpa. Prokurador General den su sondeo a bai buska den registronan penal manehá pa Minister di Hustisia na Hulanda. Segun abogadonan di Chong esei ta robes.

Ta asina bo tin un registro di antesedente penal (strafblad register) kual ta registrá historia deliktivo di un persona i un sistema di karchi di kastigu (strafkaarten systeem). Den e registro di antesedente penal ta bai tur órden di hues manera verediktonan. Ta trata di un registro riba antesedente penal unda tin e desishonnan tumá pa korte penal. Den e sistema di karchi di kastigu, tin e rapòrtnan di polis, multanan polisial ets. Ta trata di dos registrashon diferente, pero sumamente importante den kaso di Chong i su proseso di nombramentu.  Na momento un persona risibi un kastigu di hues penal bo ta drenta den e registro di historia deliktivo (strafregister). Pa Chong esaki ta relevante pa su kandidatura. E dekreto nashonal riba integridat di minister ta splika ku na momento mester hasi un investigashon pa presentashon di kandidatura pa minister mester konsulta e registro di antesedente deliktivo (strafregister) pero tambe e registro karchi di kastigu (strafkaart). Despues di e sondeo den ámbos registro, mester mèldu resultado di nan investigashon, miéntras esakinan ta presente.

Esaki ta nifiká, si un kandidato a risibi un kastigu penal den pasado bo ta drenta den e registro di antesedente kriminal i konforme lei, mester tin un veredikto pero e veredikto despues di un temporada ta sali for di e registro di antesedente kriminal (strafblad register). Esei ta nifiká ku e veredikto no ta keda permanente den e registro di antesedente kriminal. Esaki netamente ta e diskushon den e kaso di nombramentu di Ramon Chong. Ku esaki Chong ke start un proseso nobo pa bira minister.

Pero, pa e por inisiá un proseso pa bira minister, e partidonan den koalishon mester ta di akuerdo. Segun Chong MFK a yega di aserk’é pa bira nan presidente. Segun Chester Peterson si e yega asina leu mes ku e por bira minister, ta PNP komo su partido polítiko mester por hasi su presentashon di kandidatura. Postulashon di Chong su kandidatura segun abogado Michael Bonapart, kende a representá Chong, ta nifiká tambe un screening nobo. Bonapart a splika korte djamars último tabatin fayonan den proseder di evaluá Chong su kandidatura i esei mester sosodé di nobo. Ta netamente e desishon ei Chong i su abogadonan ta spera di korte. Lokual bini despues mester keda atendé pa polítika.