Difísil pa  bisa si Damen por garantisá servisio na klientenan.

WILLEMSTAD – Durante e reunion luna pasá tokante e último desaroyonan na Damen Shiprepair Curaçao, Minister di Desaroyo Ekonómiko Ruisandro Cijntje, a splika tokante garantia na kliente riba pregunta di Parlamentario Maria Nita di frakshon di MFK. Nita a puntra anteriormente si Damen Shiprepair Curaçao (DSCu) por garantisá servisio na su klientenan.

Segun Cijntje e pregunta ta unu difísil, pasó tur e puntonan di urgensia ku ta urgente pa drecha e Dòk ta puntonan ku tin un periodo di término largu. Esaki ta hasi ku ta te na 2024 numa lo atendé ku e puntonan mas krusial.  Cijntje i Gerensia di Damen Shiprepair Curaçao (DSCu) Peter Luiten i Gerensia di CDM Holding N.V. (CDM) Agustin Diaz jr. lo reuní otro siman atrobe ku Parlamento pa sigui deliberá tokante e tema. E Minister a manda un dokumento ku tur kontesta pa Parlamento, riba preguntanan ku kada miembro a hasi durante reunionnan anterior ku Presidente di Parlamento Charetti America-Francisca pa un òf otro motibu mester a skòrs te otro aviso.

Riba e punto di garantia Cijntje a sigui splika ku e servisio ku Damen a duna durante e aña akí i tambe durante 2022 na klientenan, no ta na e nivel ku Damen su klientenan por spera di un Dòk ku ta funshoná bon. No opstanten e defisiensianan téknko di e Dòk, Damen a realisá negoshi na balor di 37 mion dòler. E espektativa ta ku e negoshi por sigui krese manera finalisá e invershonnan den e infrastruktura.

Parlamentario Fergino Brownbill tambe a hasi algun pregunta tokante e kompania pa pueblo haña aklarashon, manera kua ta e merkado di Damen i di unda su klientenan ta bin. Segun gobièrnu, Damen ta ofresé servisio na klientenan di diferente área. E barkunan ku ta nabegá den Karibe ta konsistí primordialmente di tènkernan di ‘offshore’ i di kònteiner, ‘tugboats’ di hopi karga, barkunan di pasahero i barkunan di patruyage i di marina. E dos dòknan aktual no ta adekuá pa barkunan chikí.

Dòk di mas malu

Miembro di frakshon di PAR Steven Croes tabata ke sa konta ku e kompetensia kontra Damen, ken nan ta i ki ta nos posishon pa ku nan. Cijntje ta kontestá ku den e region di Karibe, Damen ta mira e Dòknan di Panamá, Méhiko, Sürnam i Bahamas komo Dòknan na kua nos klientenan por kita bai. Damen ta diferensiá su mes for di e otro Dòknan dor di e ubikashon stratégiko i bon, ku ta pafó di e zona di orkan, nan Dòk di tamaño di Aframax i nan diversidat na trahadónan profeshonal. Pa loke ta trata e fleksibilidat di nos Dòk pa por oumentá Damen su oferta di trabou, nos Dòk ta esun ku tin e posishon di mas malu di tur e otro Dòknan den nos region i sigur si kompará ku Damen su kompetensia den Europa. Riba término kòrtiku mester buska un solushon pa esaki. Segun Cijntje, por haña esaki bèk den e karta di petishon ku a manda pa gobièrnu.

Sifranan

Riba pregunta di Parlamentario Quincy Girigorie ku ademas ta lider di PAR, Cijntje a agregá ku a pèrdè hopi ganashi dor di e problemanan ku e refineria i e sanshonnan pa ku Venezuela. Girigorie a puntra kuantu barku a bishitá e Dòk entre 2012 i 2022. El a kontestá refiriendo na Venezuela i agregá ku e Dòk a sa di minimalisá e pèrdida akí di un manera basta bon, dor di penetrá riba otro merkadonan. Parlamentario Nita tambe tabata ke sa kuantu barku a hasi uso di e servisio di nos Dòk for di 2016. Na 2017 tabatin 65, na 2018 tabatin 87, na 2019 tabatin 98, na 2020 tabatin 87, na 2021 tabatin 53 i na 2022 tabatin 66 barku. Segun Cijntje, e entrada di e Dòk no ta determiná solamente dor di e kantidat di barku, pero prinsipalmente dor di e kantidat di trabou di reparashon di kada barku.

Seguridat

Brownbill a hasi pregunta tambe tokante seguridat di DSCu. El a puntra kiko ta e plan pa atendé ku e situashon insigur pa e personal. Cijntje a kontestá ku mayoria invershon ta dirigí riba drecha e produktividat di e Dòk. Si resultá ku e seguridat di e trahadónan, ora nan ta traha riba un barku no por ta garantisá, e ora ei DSCu lo no sigui ku e trabounan. E echo ku a stòp di usa e krannan dje Dòk i a kuminsá usa kran mobil, ta un bon ehèmpel di esaki. E invershonnan ta dirigí sí pa manda seguridat na trabou na un nivel mas altu.

Pa garantisá seguridat, Damen a tuma un hefe di seguridat i un ‘operations manager’ nobo ku rais na Kòrsou den servisio, ku ta trese un mihó komunikashon. Esaki ta forma e base pa prevení aksidente riba tereno di trabou. Banda di e instrukshonnan di seguridat standart di e Dòk, tin un grupo di WhatsApp tambe pa trahadónan, kaminda por mèldu kada situashon peligroso, despues di kua mesora ta tuma akshon. I kaminda den e mesun grupo di app ta hasi esaki konosí.