Willemstad—— Curaçao Medical Center ta ofresé tratamentu intervenshonista kontra doló. E spesialidat médiko relativamente nobo aki ta ofresé diagnóstiko i tratamentu pa pashèntnan ku vários tipo di doló.

Mayoria pashènt ku wòrdu referí pa CMC pa e tratamentu spesífiko akí ya a purba vários método i tratamentu médiko standart i normal via nan dòkter di kas òf otro spesialista sin por haña e resultado deseá. Pashèntnan ku por benefisiá di e tratamentu akí ta entre otro: esnan ku malesanan króniko òf agudo manera doló di lomba, diabétiko, leshonnan di nèrvio, doló relashoná ku kanser, dolónan pos-operativo, i tambe leshon despues di un aksidente.

Anestesiólogonan di CMC ku ta praktiká e tratamentu aki por trata tur nivel di doló pa medio di téknikanan ku ta mínimo invasivo manera terapia di inyekshon òf radiofrekuensia. Tur e proseduranan aki ta poliklíniko, pues no ta rekerí pa pasa anochi den hòspital.