Mart 2023: entretantu 1 aña a transkurí riba e desishon. Na Mart 2023, eks miembronan den direktiva di e organisashon spesialista a deliberá ku Silvania.

Otrobanda— E problema di plafòn salarial pa spesialistanan na CMC, ainda no ta solushoná. Anke mester menshoná ku e direktiva resien di nan organisashon ta trahando riba e problema ku Departamento di Finansas. Ta sospechá ku por lo menos 17 spesialista lo bandoná CMC.

Manera ta konosí tantu CMC komo e asosashon di spesialista a pèrdè un wisio sumario entamá di nan parti. Durante e wisio sumario miembronan di gerensha di CMC a splika ku mayoria spesialista ku tin suerte lo finalisá nan estudio komo spesialista médiko na momentu ku nan tin 35 aña, esei ta mas o ménos 15 aña di estudio. Unabes e spesialista kuminsá traha, e spesialista mester tene kuenta ku pago bèk di nan debe di estudio i kuminsá spar sèn pa nan penshun. Un èks-studiante médiko a indiká na Vigilante ku un estudio di 6 aña a sòru ku e tin mas ku 100 mil florin di debe di estudio. Akaso e studiante sigui spesialisá por konta entre 50 mil pa 100 mil florin ariba. Esaki ta nifiká ku un spesialista médiko lo finalisá nan estudio ku un debe total di entre 150 mil pa 200 mil florin dependé kua speshalisashon nan kis i dependé kon largu nan estudio ta dura.

Despues ku Gobièrnu di Kòrsou, riba insistensia  di Pakete di Pais, imponé pa Hulanda a introdusí un Plafon Salarial pa spesialistanan den servisio na CMC, hopi prospekto kabando nan estudio pa regresá kas a wanta nan desishon. No esei so, un grupo grandi di spesialista trahando riba e Plafon Salarial a kuminsá hasi nan trámitenan pa muda. Esaki ta formando un menasa pa e “kurva” di eksperensha den e instituto, kual si e grupo bandoná CMC, ta bai atras.

Segun e spesialistanan, e hòspital no ta kumpli ku kriterio di finansiamentu pa wòrdu konsiderá komo un kompania di gobièrnu. Pa un kompania wòrdu konsiderá komo un kompania di gobièrnu, e kompania mester risibí mas ku 50% di su entrada via supsidio di pais Kòrsou. Den e kaso di CMC esaki no ta sosodé. CMC ta risibí gran parti di su entrada via di SVB, kual ta un persona hurídiko, pues SVB no ta gobièrnu. Mas aleu, e pagonan di SVB ta wòrdu risibí despues ku trabounan médiko wòrdu ehekutá dor di CMC, pues no por konsiderá e pagonan hasí dor di SVB komo un supsidio pa CMC. Korte a mira e kosnan otro, lokual a pone ku CMC ta obligá na konsiderá pa apliká e lei pa plafoná salario.

E desishon di korte, alabes a shòk e spesialistanan. Mirando ku CMC, segun korte,  ta kumpli ku kriterionan pa wòrdu konsiderá komo un entidat/organisashon gubernamental, spesialistanan di CMC ta keda inkluí pa e plafon salarial ku a drenta na vigor na desèmber 2022. Durante tratamentu di e wisio e asosiashon di spesialista LVMPiLC a suplika pa eksonerá dòkternan médiko for di e plafòn salarial. Nan abogado Mirto Murray a splika ku e plafòn salarial lo bira un dje rasonnan dikon spesialistanan lo bandoná CMC. Den kolaborashon ku Asosiashon Médiko di Antias(AMA), ámbos asosiashon a puntra algun miembro si nan ta duda pa debolbé Kòrsou mirando e diskushon nan rondó di e plafòn salarial(e lei LNT). For di un enkuesta yená dor di 28 spesialista Yu di Kòrsou, 93% a indiká ku nan ta duda pa regresá Kòrsou mirando ku e lei LNT ta na vigor.

Entretantu e problema a bira latento i no ta tende muchu mas. Pero, un spesialista dr. Michel Berry, si a apelá e veredikto den korte i ta pendiente e solushon ku Gobièrnu por presentá pa evitá ku spesialistanan mas eksperensia por bandoná e instituto. Durante un rueda di prensa, e médikonan spesialista a insistí ku nan problema no ta pa e sèn, sino atkishon di spesialista nobo, bou di e plafon di pago ta bira imposibel. Si mantené e plafòn di salario, segun spesialista Berry, nan por atras pa entre 30 pa 60%.