Nieuwe Haven- E Coca-Cola Scholarship Program di Curaçao Beverage Bottling Company ku sumo plaser, ta regalá un ‘full scholarship’ den kolaborashon ku The University of Curaçao dr. Moises da Costa Gomez (UOC).

Komo parti di e propósito di Coca-Cola pa refreská mundu i hasi diferensha, e Coca-Cola Scholarship Program ta den buskeda di lidernan ku abilidat pa impaktá nos komunidat i mundu kompletu ku e magia real. Den kuadro di esaki, e Coca-Cola Scholarship Program ta duna oportunidat na studiantenan ku ta interesá den e estudio ‘International Hospitality and Tourism Management’ (IH&TM) na UOC, pa apliká i asina partisipá pa risibí un ‘full scholarship’ durante 4 aña pa kubri gastunan di estudio i di buki.

IH&TM ta un estudio bachelor di 4 aña, ku ta prepará i yuda desaroyá studiantenan pa kareranan riba nivel di supervisor i/òf management den e sektor di hoteleria i turismo. E merkado aki a bin ta konosé kresementu signifikante pa nos isla, mirando e kantidat di hotèlnan nobo i otro hotèlnan ku ta den proseso pa ekspanshon. Esaki ta nifiká mas transporte aereo, kual ta trese mas turista ku ta krea espasio pa mas restorant, atrakshon, musea èts. Komo resultado di esaki, un invershon den e kapital humano ta rekerí, komo e oportunidat aki ta krea mas kupo di trabou pa profeshonalnan kapasitá den e sektor aki.

Kondishonnan pa apliká

Pa registrá pa e Coca-Cola Scholarship Program ta fásil. E siguiente kondishonnan ta aplikabel: e studiante mester

• inkluí un ‘essay’ di dos pagina òf un video di dos minüt, splikando lo siguiente:
• interes di e studiante den e estudio di IH&TM;
• kontribushon di e beka na e studiante su karera profeshonal;
• loke ta hasi e studiante e kantidato apropiá pa e beka aki;
• e importansia di IH&TM pa e ekonomia di Kòrsou I di ki manera e studiante lo hasi ‘é’ diferensia den e sektor di hoteleria i turismo.
• Tambe e studiante mester:
• ta inskribí pa e estudio di IH&TM na UOC;
• tin un sedulá bálido; 
• ‘upload’ su cv, su lista di punto – i su diploma di su último estudio (VSBO4, HAVO5 òf VWO 6);

E studiante mester atkerí un minimo di 50 (for di 60) ‘studiepunten’ pa aña, pa asina aki e mantené su beka durante di e añanan eskolar ku ta sigui. Tambe Coca-Cola lo fasilitá e studiante ku un sekshon di ‘mentoring’.

Apliká ta fasil, por haña e lenk pa inskribí riba e reto sosial Facebook/CocaColaCurcao i riba Instagram/CocaColaKorsou. Por apliká te ku djaweps 17 di ougùstùs 2023. E ganadó felis lo wòrdu anunsiá djaluna 21 di ougùstùs 2023.