WILLEMSTAD – Defensor di Pueblo Keursly Concincion a manda un karta di preokupashon pa Minister di Salubridat Javier Silvania, pidiendo atenshon pa malesanan sikogeriatriko. Ta trata akí di malesanan na of den e serebro di un persona di edat avansá. Un kaso spesífiko a yega ofisina di Defensor di Pueblo, loke a tira lus riba un problemátiko mas kompliká. P’esei e ke pa Silvania hasi algu pa e grandinan ku ta biba nan so i ku práktikamente ta lagá pa nan kuenta, ya ku gobièrnu no por yuda nan sin mas.

Defensor di Pueblo a tuma nota di e diferente notisianan den medionan di komunikashon ku e Ministerio di Salubridat ta ehersiendo supervishonnan mas rigoroso di kuido den e asina yamá ‘kasnan di grandi’. Pero Concincion ta pidi atenshon spesial di Silvania pa e situashon di siudadanonan ku ta biba nan so i ku pa motibu di behes ta sufri di un tipo di malesa na òf den nan serebro. Den práktika hopi dje siudadanonan akí tin limitashonnan analítiko i nan abilidatnan sosial ta bayendo atras, loke ta pone ku ta bira un desafio pa nan hiba un bida di bon kalidat.

Concincion a splika Silvania ku el a manda e karta p’e, pasó un siudadano ansiano femenino a aserk’é pa solushoná algun problema ku e ta konfrontá kuné pa algun tempu kaba. Sinembargo, Defensor di Pueblo mes no tabatin outoridat pa solushoná e problemanan akí, pero el a ripará hopi rápido ku e dama no tabata den estado di sòru pa su mes bon mas, sin niun yudansa òf guia. Despues a resultá ku e ta sufri dje malesa di alzheimer. “Pa por a yuda e siudadano ku su situashon (di malesa), a buska kontakto telefóniko ku miembronan di su famia i diferente organisashon i institutonan gubernamental, ku den prinsipio ta hunga un ròl den kuido pa i guia di e personanan ku ta sufri di malesanan sikogeriatriko. Pero e kòmbersashonnan no a resultá den solushonnan konkreto.”

Segun Defensor di Pueblo, for di diferente kòmbersashonnan ku vários organisashon i institutonan gubernamental el a establesé ku un siudadano ku ta biba su so i ku mentalmente no ta den e estado pa sòru pa su mes, den práktika por haña yudansa di gobièrnu solamente si un miembro di famia òf un otro persona hasi su mes legalmente responsabel p’e. Ku otro palabra bira responsabel den sentido hurídiko dje pashènt. Concincion: “Un medida di gobièrnu manera laga interná e siudadano den un instituto será pa e risibí e kuido médiko nesesario di forma obligatorio, den e tipo di kasonan akí porlotantu no ta posibel. Asina ta práktikamente laga e siudadano pa su kuenta.”

Preokupashon i desafionan

For di informashon risibí serka organisashonnan manera Fundashon Alzheimer, ta resultá ku pa 2025 e kantidat di persona ku ta sufri di demensia lo oumentá mundialmente. “Na Kòrsou no tin sifranan konkreto ni pronóstikonan ainda, pero teniendo kuenta ku e echo ku embeyesimentu ta oumentá riba e isla, por bisa koutelosamente ku si e situashon no kambia, e chèns ta grandi ku por spera un oumento den e kantidat di kasonan di malesanan sikogeriatriko na Kòrsou.” Segun Concincion, Raad voor Ouderenbeleid a duna un splikashon amplio tokante e desafionan i trabanan den kuido di grandi riba nos isla, den su rapòrt entregá na gobièrnu, titulá ‘Adviesrapport Wet- en Regelgeving Ouderenzorg’. “E rapòrt konteniendo e konklushonnan ta konosí serka bo ministerio. Mester bisa ku e konklushon dje situashon ku a kondusí na skibrimentu dje karta akí no ta un insidente riba su mes i ku e oumento di embeyesimentu lo sigui kondusí na empeoramentu dje situashon aktual, si no tuma medidanan preventivo na tempu.”

Konklushon i rekomendashon

Defensor di Pueblo ta enfatisá den su karta na Silvania ku tur siudadano ku ta vulnerabel i ku no por skapa su mes su so mas, tin derecho riba un kalidat di bida bon. “Gobièrnu por kontribuí na esaki dor di entre otro sòru pa tin sufisiente i bon akseso na kuido (médiko) adekuá. P’esei ta pidibo konsiderá durante establesimentu i ehekushon dje maneho di salubridat i di grandinan na Kòrsou, e siguiente puntonan: duna atenshon tambe na prevenshon di malesanan sikogeriatriko; brinda bon guia na pashèntnan ku ta sufri dje malesanan akí i tambe na e personanan ku ta kuida nan (mantelzorg); sòru pa kompilashon i análisis adekuá di datonan disponibel; i sòru pa regulashonnan legal adekuá – ku protekshon legal adekuá – i ku ta hasi posibel pa grandinan ku ta biba nan so ku malesa sikogeriatriko por risibí e sosten, yudansa i kuido nesesario.”