WILLEMSTAD – Minister di Tráfiko, Transporte i Planifikashon Urbano Charles Cooper a skirbi un karta na sekretario di e Komishon Fiho di Infrastruktura ku e petishon pa organisá un reunion. E Minister ta enfatisá den e karta, e importansia di transparensia i kooperashon ku e komishon i ta sugerí pa duna un presentashon tokante dos tópiko krúsial relashoná ku Domeinbeheer.

Promé ku tur kos, e Minister kier informá e komishon tokante e estado di avanse di e proyekto di nota di avanse (“project voorschotnota”). E proyekto akí ta di gran importansia teniendo kuenta ku e embolbimentu di e komishon den e Proyekto Piloto di Domeinbeheer. Na di dos lugá, e Minister kier informá e komishon tokante e trabounan i tareanan di Domeinbeheer. E Minister ta enfatisá den su karta ku e kompartimentu di e informashon akí no solamente lo mehorá e efektividat di e trabou konhunto, pero tambe lo establesé un komprenshon mas profundo di e desafionan i oportunidatnan ku nan ta enfrentá.

P’esei e Minister ta pidi e komishon pa establesé un fecha i orario adekuá pa e presentashon. El a pidi pa invitá un delegashon di Plataforma Banda Ariba ariba. E Minister di Infrastruktura ta enfatisá ku nan ta kla pa duna tur e informashon nesesario i kontestá preguntanan di e komishon. E koperashon di e komishon den planifikashon di e presentashon akí ta wòrdu hopi apresiá, i e Minister ta spera pa un interkambio fruktífero di konosementu i persepshon durante e reunion.