Den e pakinan di chips a bin topa ku droga.

NIEUWE HAVEN,– Un dama hóben ku ta traha den Horeca tambe a presentá den korte ayera pa akusashon di eksportashon di droga.

Ta trata di dama R.R.H kende ta keda akusá ku dia 11 di ougùstùs el a pòst un pakete ku den dje algun artíkulo i tambe 4 paki di chips karga ku droga i ku en total a pisa 587 gram.

E dama a konta hues ku e tabata bayendo serka su tata i na kaminda na Rooi Santu el a bin topa ku un persona ku a pidié pa pòst algu pe.

E ta bisa ku gewon el a bai pa yuda e persona aki i el a bin hañ’é den tantu problema ku hustisia i kual e ta lamentá grandemente.

El a splika hues ku e persona a bisé ku ta paki di chips tin den e kaha i pa esei el a dun’é 100 florin pa paga i tambe 35 florin pa pone gasolin. E dama a splika ku e persona ku a dun’é e paki pa pòst ta ser yama Tol i ku for di despues di e dia ei e no a mir’é mas den e kura kaminda e tabata biba.

Na momentu ku hues tabata papia ku e dama aki tokante di su yunan, por a tuma nota kon lágrima a kuminsá sali for di su wowo bisando hues ku e lo no kier bai sera paso e kier traha pa yega na su kosnan i ku nunka mas di su bida lo e hasi e tipo di fabor nan aki pa niun hende.

FISKAL

Fiskal a bisa ku ta un situashon duru pero ta un echo kastigabel pa lei, pero mirando e sirkunstansia nan di e dama hóben aki ku tin dos yu, e lo husga e dama riba e kantidat di te ku 500 gram, pues ta laga 87 gram kai di manera ku e por suavisá e kastigu pa un mama ku dos yu i ku ta lucha pa e por biba. Fiskal a pidi 180 ora di trabou i 9 luna kondishonal ku tempu di prueba di 3 aña.

HUES

Hues mesora a tuma desishon sin bai patras i a bai di akuerdo kompletamente ku e fiskal ku e kastigu di 180 ora di trabou i 9 luna kondishonal ku tempu di prueba di 3 anan i a splika e dama pa wak pa e no hañ’é den problema mas paso e lo mester kuminsá na sinta e 9 lunanan ku tin kologá riba su kabes awor.