Willemstad,– Riba facebook personal di Dulce Bonifacio por nota ku tur siman di nobo e dama ta publiká kasonan kaminda kachónan ta wòrdu maltratá.

Sea a kachó a wòrdu di dùmp òf e kachó ta kana tur na sarna, tur e tipo di kasonan aki e dama ta publiká riba su facebook personal pa asina konsientisá pueblo di Kòrsou ku ketubai maltrato di bestia ta tuma lugá.

Un publikashon k a risibí reakshon riba ret sosial tabata un kaso kaminda un kachó a wòrdu venená dor di un siudadano. Ta asina ku riba e publikashon riba ret sosial e dama ta indiká ku e tabata kuida un kachó di kaya ku tabata biba den Kirindongo Abou pa 13 aña. Ta asina ku algun aña tras di lomba, e doño di e kachó a indiká ku e ta bai biba na eksterior i e doño a pidi Dulce pa kuida e kachó. Apesar ku e dama tabata bai ku e kachó kas, kada bes e kachó ta logra sali for di e kurá i kana bai na e kas prinsipal na Kirindongo Abou.

Apesar ku e kachó tabata wòrdu kuidá dor di Dulce i e bisiñanan na Kirindongo Abou, e Dulce a publiká riba Facebook ku el a keda sorprendé di risibí notifikashon ku e kachó aki a wòrdu venená. Por konstatá ku e kachó a wòrdu venená mirando ku sanger i skuma tabata sali for di boka di e kachó. Ta asina ku un habitante nobo ku ta biba den e kaya lo ta akusá di e venená e kachó debí ku den pasado e habitante aki lo a reklamá ku tin un kachó di kaya ta kana den bisindario di su kas. Tambe Dulce a publiká riba ret sosial ku outoridatnan no ta aktuando riba tipo di kaso asina i ku e ta sinti su mes tristu i sin poder pa yuda.

Aña pasá durante un rekorido ku Dulce Bonifacio e dama a indiká na Vigilante ku e ta kontrolá tur kaha “bashí” kantu di kaya debí ku den e kahanan aki sa tin kachó bandoná aden. Ta asina Dulce sa asta publiká riba ret sosial ku e sa sinti su mes kibrá na momentu e diskubrí kachónan bandoná den mondi òf kantu di kaya.

For di 1994 señor Dulce Bonifacio ta reskatá kachónan di kaya òf kachó nan ku a keda maltratá. Debí na falta di fondo i yudansa di otro organisashon nan konserní, e dama a opta pa transformá su kurá i kas den un “sanctuary” kaminda mas ku 200 kachó ta bibando. Tur dia e kachónan ta risibí kuminda i awa fresku i si ta nesesario, e kachónan ta risibí nan kuido médiko tambe.

Kaminda Dulce Bonifacio a kuminsá ku kuido di kachó na 1994, den e mesun aña el a entregá un petishon na “Domeinbeheer” pa asina e risibí un tereno adekuá pa su kachónan. Ketubai Bonifacio ta riba e lista di espera i apesar di a papia ku tur mandatario ku a goberná pais Kòrsou den e último 29 añanan, e ruta aki no ta dunando e resultado deseá.

Pa donashon na e fundashon di Dulce Bonifacio, Stichting Animals Are Our Friends, por stòrt riba kuenta di Banco di Caribe: 3311001.