WILLEMSTAD – Despues di 5 aña konsekutivo di pèrdida bou di maneho di Damen, ta parse ku un biaha mas e waf ta hibando pèrdida strukturalmente. Damen no a logra hasi e waf lukrativo. Asina Damen Shiprepair Curaçao (DSCu) a splika riba pregunta di Parlamentu, segun Minister di Desaroyo Ekonómiko Ruisandro Cijntje.

Sinembargo, e pèrdida dje último añanan no a tuma lugá bou di operashon normal. Tabatin diferente faktor ku a stroba e ‘businessplan’ di 2017. Cijntje den su kontestanan: “E dòknan flotante ku nos a risibí no a sòru pa un subida di ganashi struktural pa motibu di problemanan tékniko i operashonal. E dos añanan di COVID tabatin un influensia hopi negativo riba desaroyo di benta. Mirando ku no tabatin ganashi serka Damen Shiprepair Curaçao, no por yena e fondo di invershon i pa e motibu akí, e estado tékniko dje waf a dekaí.”

Pa por determiná si akaso e astiyero na Kòrsou tin derecho di eksistensia, gobièrnu hulandes a kontratá KPMG pa desaroyá un ‘businessplan’ nobo i ahustá huntu ku Damen, CDM Holding i gobièrnu di Kòrsou. “Un desafío grandi pa logra ku e ‘businessplan’ akí ta eksitoso, tabata e nesesidat pa buska espasio di invershon pa por renobá e kondishon tékniko deteriorante di e waf. Durante e añanan tras di lomba, DSCu tabata responsabel pa e mantenshon diario di e waf. Komo operadó dje waf, Damen no ta responsabel p’e invershonnan struktural den e astiyero.”

Segun Cijntje, Damen lo a krea e espasio finansiero akí pa invertí den e waf serka CDMH, dor di parsialmente reservá e ganashi den e fondo di invershon pa e astiyero. Pa motibu di e falta di ganashi serka DSCu i e depósitonan ku no por keda realisá komo konsekuensia di esaki den e fondo di invershon di CDMH, CDMH no tabatin sufisiente espasio di invershon pa tene e estado tékniko dje waf riba nivel. “Damen ta simplemente e operadó dje astiyero i CDM Holding ta e doño dje waf. Den e añanan tras di lomba CDM Holding no tabata den posishon pa pone finansiamentu disponibel pa e invershonnan nesesario pa por a duna e waf na un ‘upgrade’ tékniko. E falta di ganashi serka DSCu a okashoná esaki. Aparte di esaki, CDM Holding no por a aserká gobièrnu di Kòrsou konsiderando ku e chèns pa esaki logra tabata chikí mirando e situashon finansiero di gobièrnu.”

Segun Cijntje pa e ‘businessplan’ por ta eksitoso tabata nesesario pa a buska finansiamentu eksterno p’e invershonnan nesesario den e infrastruktura dje waf. Solamente di e forma ei lo por a duna kontenido na e mehorashonnan nesesario proponé den e ‘businessplan’ i salbaguardiá e kontinuidat dje astiyero. Na final, e a haña e sosten finansiero p’e mehorashonnan infrastruktural serka gobièrnu hulandes. A duna e finansiamentu bou di e kondishon ku mester proba e derecho di eksistensia dje waf. “E ‘businessplan’ nobo di KPMG a sali for di e punto di bista ku por lo pronto e waf tin solamente dos dòk kobá operashonal. For di e rapòrt sinembargo ta bini dilanti ku e waf por tin derecho ku eksistensia solamente si traha riba algun faktor adishonal ku lo ta determinante pa por garantisá ganashi. Bou di esaki ta kai un redukshon parsial den e datonan di personal fiho, fleksibilisashon di labor di tantu e personal komo propio, komo esnan temporal, i mehorashon dje infrastruktura dje waf. “E astiyero mester por mustra ku e kambionan menshoná ta posibel, dor di kua e waf e ora ei lo krea su propio derecho di eksistensia. Por garantisá e derecho di eksistensia di e waf solamente si kumpli ku tur e kondishonnan stipulá den e ‘businessplan’ di KPMG ku éksito. Damen a entregá un petishon (verzoekschrift) serka Ministerio di SOAW den kua ta duna splikashon di ki manera gobièrnu di Kòrsou por kontribuí na e kambionnan nesesario.”