Delegashon di Kòrsou ta yega Comuna 13 na Medellin
February 2, 2022 • 2 minüt pa lesa
Kompania: embahadora di e delagashon fo’i Kòrsou, Chanelle de Lau ta pará banda di dos militar dilanti stashon di metro na San Antonia, Medellin.
Medellin—E delegashon di Kòrsou ku ta bishitando Medellin riba invitashon di Aeroliña Sarpa, ayera a sigui ku nan programa. Den oranan di mainta a bishita e Metrocable via di e stashon San Antonio i mas lat mèrdia e delegashon a kana den e bario di Comuna 13.
Pa lokual ta trata e Metrocable, guianan turístiko na Medellin a mustra e representashon di Kòrsou e sistema di transporte via telefériko unda tabatin oportunidat di tour ida buelta den serunan haltu di Medellin. Despues di e tour den Metrocable e guianan turístiko a hiba e invitadonan di Sarpa pa e bario Comuna13. Comuna 13 ta un bario den Medellin transformá den un atrakshon turístiko ku hopi pintura i arte mural unda miónes di turista ta hasi bishita. Ta un bista bunita mira kon e siudat di Medellin a transformá Comuna13. Un hecho ku Kòrsou por siña hopi fo’i dje prinsipalmente den hanchinan di Otrobanda.
Mas den oranan di mèrdia e organisashon di ekshibishon médiko mas grandi di Kolombia, Comeeva a tene un presentashon na e restorant Hacienda. Einan Alvaro Duran, gerente general di e organisashon a duna detaye riba e operashon i struktura di Comeeva. Comeeva ta un organisashon médiko nashonal ku ta fasilitá kuido médiko na Kolombia dor di fasilitá e partinan logístiko pa e pashènt. E organisashon ta bende anualmente alrededor di 12 mion dòler dunando asistensha i alokashon na pashèntnan pa kuido médiko rònt Kolombia.
Coomeva alabes ta duna servisio den área di Karibe, prinsipalmente na Aruba, Kòrsou, Boneiru i demas islanan di Reino Hulandes den Karibe. Tambe nan ta dunando asistensha na Trinidad and Tobago i ta aktualisando trámitenan pa subi merkado na Estádos Unídos. Ayera durante nan presentashon, Duran a konfirmá nan kompromisonan ku Kòrsou pa fasilitá kuido médiko na Kolombia. Te intenshon pa plania un bishita ehekutivo na Kòrsou huntu ku e aéreo liña Sarpa. Awe e tour di Sarpa ta finalisá sperando pa regresá Kòrsou djaweps, esta mañan.
Bista di Medellin for di Metrocable ku ta sirkula riba barionan di Medellin
Comuna 13: Chanelle de Lau ta sintá riba un letrero ku ta reflehá Museo di Comuna 13. Mini Futbòl: unu di e atrakashonnan den Comuna 13 ta un vèlt di minis futbòl mei mei di e bario ku su propio stadion.
Mural: Comuna 13 ta konosi pa su arte mural, algu sigur Kòrsou mester siña for di dje. Alvaro Duran di Comeeva dunando informashon di nan organisashon durante un almuerso na Hacienda.
