DEN HAAG—Munisipio di Den Haag ta bai kumpra dos lokalidat bashí di HagaZiekenhuis pa konstruí apartamentonan.

E konseho munisipal ta spera pa denter di tres pa 5 aña konstruí sientos di apartamento segun Omroep West. Mientrastantu e edifisio ta bini liber pa bibiendanan temporal. For di yüli e munisipio ta negoshá ku e hospital na Den Haag riba kompra di e edifisionan bashí. Awor nan a yega na un akuerdo. E preis no ta kla. E intenshon ta ku e eks-hospital lo keda entregá fin di luna na e munisipio. No ta konosí ken ta bai biba den e bibiendanan nobo. Pa esaki e munisipio lo papia ku habitantenan. E munisipio a informá ku e edifisio lo keda disponibel riba termino korto temporalmente komo bibienda pa diferente grupo. Tur dos edifisio ku ta pega ku otro ta para bashí masha tempu pasobra e hospital a trasladá e kuido pa otro lokalidatnan. Den tempu di corona a usa e hospital bieu pa lokalidat di bakunashon. Den un dje edifisionan tin akomodashon pa hendenan sin kas for di aña pasá. No ta konosí kiko e konsekuensianan ta pa e akomodashon. Den próksimo tempu ta investigá si tin asbest den e edifisio. Pa esaki e munisipio a reserva 750.000 euro. Eventualmente e munisipio lo reparti gastunan ku e hospital.