Paro: te ainda no tin moveshon di gasolin na Mal Pais.

Mal Pais— E Asosashon Doñonan di Pòmp Gasolin (ASOGAS), Curaçao Oil Products Distributors Association (COPDA) mañan ta pendiente un desishon den korte. E dos organisashonnan ta entamá un kaso kontra di Minister di Asuntunan Ekonómiko, i asosiado di interes, St. Helena Pompstation i Pabow Real Estate.

E desishon ta programa mañan mainta pa 8.45 mainta i ta den mas di wes sivil mr. Ter Borg. Ta trata di un disputa unda COPDA i ASOGAS a bai korte despues ku St Helena a haña rason di tabatin un pèrmit pa konstrukshon di un pomp di gasolin na Mal Pais. Ta asina ku riba 17 di yüni 2021 mediante un karta di gobièrnu St. Helena mester a para tur konstrukshon. Pero 2 luna despues, St Helena i su konstruktor ta sigui konstruí despues di a manda un karta pa gobièrnu ku debidamente tin un pèrmit di konstrukshon i okupashon di tereno. COPDA i ASOGAS a bira furioso i entamá un wisio.

Promé ku e kaso a yega Korte Atministrativo, COPDA huntu ku ASOGAS a pèrdè un wisio sumario kontra di St. Helena Pompstation i gobièrnu di Kòrsou. E dos organisashonnan den un intento agresivo mediante korte a eksihí pa St. Helena destruí tur lokual nan a konstruí na Mal Pais-Wechi. Ta trata di e pòmp di gasolin nobo. Manera ta konosí riba 12 di yanüari 2017 un aksidente fatal a tuma lugá na pòmp di gasolin na St. Helena. Despues di e aksidente, e kompania a kuminsá hasi trámitenan pa realoká nan pòmp di St Helena pa Kaminda di Westpunt. E kompania a hasi tur e trámitenan nesesario pa logra i risibi pèrmit di konstrukshon i okupashon di tereno.  St Helena a risibi e pèrmitnan pero nan mester a entrega dokumentashonnan adishonal pa adaptashon di e pèrmitnan. E prosedura aki a keda un poko pegá den molina di Gobièrnu.

COPDA i ASOGAS, entretantu a mustra nan mal kontentu riba e petishon nobo i keda sin duna nan konseho. Ademas nan a kuminsá argumentá ku St Helena no a tene kuenta ku nan dekreto di mantené un distansha di 5 km foi otro pòmp. COPDA i ASOGAS, klaramente no ta di akuerdo pa St Helena logra pone un pòmp den e área di Wechi i Mal pais i nan a start un prosedura kontra di St. Helena, Gobièrnu di Kòrsou i propietario di e tereno.

Durante e tratamentu den korte atministrativo, e dos organisashonnan tabata kier pa korte ordená un paro inmediato di tur konstrukshon i destrukshon di lokual a konstruí i restablesé e tereno den su forma original. Un desishon drástiko miéntras ku segun Korte, St Helena tabatin tur pèrmit nesesario. E desishon ta unu importante pa tur e organisashonnan envolví ku e disputa.