Tabata na altura di e sentro komersial na Brievengat unda e atrako a tuma luga.

Willemstad—- Felix Barton ( 1988), despues di tabata nèt 3 luna i mei for di Prizon unda e la kaba di sinta un kastigu pa atrako arma, e la bolbe wòrdu detené komo sospechoso den dos kaso di atrako ku arma.

Felix Barton a pidi Hues durante tratamentu den korte pa no wak su pasado pa asina kastigué riba esaki ya ku despues ku e la wòrdu liberá e la subi e bon kaminda na unda e ta bende kuminda pa asina e por kria su kuater yu nan. Hues mesora a mustra ku sigur no por tapa kara pa su karchi di kastigu ku ta reflekta kompletamente otro for di loke e mes ta bibando. Hues a mustra ku Barton na aña 2008 a keda sentensia pa 5 aña pa kaso di atrako, na 2012 e la wòrdu sentensia na 5 aña pa otro kaso di atrako, na aña 2017 e la wòrdu sentensia na 4 aña pa atrako un biaha mas i na aña 2020 e la wòrdu sentensia na 4 aña pa atrako.

Barton tabatin dos akusashon den su kontra kual tur dos ta atrako ku arma unda e ta wòrdu akusá di a usa un Toyota Yaris kolo pretu ku ta pertenesé na su frei ku ta mama di su yu nan. Tabata despues ku a logra di detené Barton pa poseshon di arma a bai na kas di su frei pa asina por a tene un entrada hudisial i einan a bin topa ku un Toyota Yaris pretu sin e emblema di Toyota na e bahul patras kual tabata kuadra ku vehíkulo ku a ser usa den dos atrako na unda a apuntá Barton sigur den un di nan komo e atrakadó. Na momento ku a detené Barton e tabatin nèt 3 luna i mei ku e la rekobrá su libertat for di Prizon despues ku e la kaba di sinta un sentensia di 4 aña pa atrako.  

Barton den korte mes a bisa  a no bai husge pa su pasado i ku enbèrdat ta nèt 3 luna i mei e tabata afó ora ku a detené pa e arma.  Tokante di e arma e no sa nada ya ku e tabata sinta patras den e vehíkulo i no a mira niun arma.  Tokante di e  outo ku a wòrdu konfiská na su kas kual ta di su frei e akusado Barton a splika ku e outo ta di su frei i ku  e mes no sa kore esaki ya ku su frei ta usa e outo tur dia pa e bai trabou i tambe buska i hiba e yunan skol. Fiskal si a mustr’é ku e outo debidamente na dos kaso di atrako a wòrdu identifiká. E promé tabata un kaso di atrako ku a tuma lugá na altura di un bankomátiko di MCB den Brievengat. E dia ei e denunsiante mester a bai tuma sèn seka un tal Chowi Martina ku a bende su skuter pe. Tabata e Chowi mes a aki ku a bisa nan pa topa na altura di e bankomátiko.  Tabata nèt despues ku e denunsiante a tuma e suma di 2 mil florin ku e la mira un yaris kolo pretu yega para dilanti di su outo. For di esaki un hòmber ku kara habri a baha ku arma den man i a menas’é ku esaki i a kana yega serka i a kita e dos mil florin i tambe a ranka su kadena di plata ku su hanger na dje. .

Seguidamente un di dos tipo pero ku kara tapa ku arma den man a baha for di e outo i a listra e denunsiante. A bai ku su telefon, un tas ku kontenido, oloshi, e suma di 2 mil florin i tambe su kadena.  Despues di esaki nan a drenta den outo i bai. Loke ku a hala atenshon ta ku esun kua bin pa trese e sèn a kore den su vehíkulo tras di e atrakadónan i a bai for di e sitio.  Ora ku e denunsiante a bai konta algun persona di loke a pas’é den e bario di Brievengat e la haña di tende ku e tipo ku a atrak’é i ku ta kore den e yaris pretu i ta biba pa kolmo den e bario di Brievengat pero ta kedando riba Seru Fortuna últimamente. Tambe nan a bisa e denunsiante ku nan sa yama e hòmber ei “ Barton El monstruo” riba facebook. Tabata e ora ku ei ku e denunsiante a bai wak riba Facebook i e la rekonosé e potrèt di e sospechoso i mesora e la bai reshèrshi na unda tambe nan a mustr’é otro potrèt ku e la bin rekonosé e akusado komo esun ku a atrak’é. 

Pa ku e otro atrako na unda tambe a usa un Toyota Yaris pretu i a kita sèn for di nan víktima no tabatin sufisiente prueba ya ku e atrakadónan tabata kara tapa. Pa Barton Fiskal a hasi un demanda di 8 aña mirando ku e ta un residivista.  Hues a kondena Barton mesora unda  ela splika ku e no kier wak e akusado su pasado pero su karchi di kastigu ta pone ku mester bai tene kuenta kuné mirando ku ta tras di otro e la wòrdu sentensia pa kasonan di atrako. Hues a haña ku e ta kulpabel pa e arma ku nan a hañ’é kuné den outo i tambe kulpabel pa e atrako den Brievengat. Pa ku esakinan Hues a yega na un sentensia di 7 aña di prizon.