Raiza Scoop.

Nieuwe Haven—Despues ku Eni Carmelia a sekuestrá i asesiná e hóben di 19 aña Razia Scoop riba 31 di desèmber 2011, famia i sernan kerí di e defuntu no tabata por a selebrá Fin di Aña mas. Esaki ta lokual wes mr. Carmelia a presentá na Eni Carmelia, siman pasá djabièrnè momento el a lesa su veredikto.

E morto di Raiza Scoop a tene e famia bastante tempu den trouma i vários miembro di famia mester a sikólogo pa tratamentu. Ruman muhé di Raiza, segun korte a kana hopi dia rònt plak pamfleta di búskeda pa Raiza Scoop te dia a bin deskubrí su restunan na Playa Canoa. Investigashon di e kaso a bin pega entre 2012 pa 2020, un periodo di kasi 8 aña. Na 2012, a bin deskubrí e telefon Black Berry di Scoop serka un hòmber Alain R. Alain R a kumpra e telefon serka un bisiña di dje, Gino P.. Riba 6 di òktober reshèrshinan a interogá Gino P. kende a bisa ku e telefon tabata prosedente for di kas di famia Carmelia kende a bin skonde e kosnan den un kas na De Savaan. Gino P a bisa ku e la bende e Black Berry ku su bisiña. Den mesun saku ku Gino P a saka e Black Berry tabatin tambe e laptop di Raiza.

Tabata te despues na 2020 ku a bolbe bin haña pruebanan despues ku Eni Carmelia mes a papai den prizon kon e la sekuestrá i asesiná e hóben Raiza Scoop. Eni a konta den detaye kon e la topa Raiza ta kana riba kaminda i despues a sekuestr’é i tene choká te na Playa Canoa unda e la violá e damita di 19 aña, asesin’é i bai bèk despues pa kima su restunan.