Yeung huntu ku su abogado a bai korte di apelashon despues ku korte a anulá su petishon pa bai operá wowo na Colombia.

Nieuwe Haven—Ayera e akusado Louisyn M. Q. Yeung a bai korte di apelashon huntu ku su abogado mr. Peppie Sulvaran, pa por a apelá esaki despues ku korte a anulá su petishon di por a bai Colombia pa asina e por a operá su wowo.

E akusado Louisyn ta wòrdu akusá di ta involukrá den un lote di 176 kilo kokaina i 1 arma kandela konfiská ku a keda konfiská dia 10 di ougùstùs di aña 2019. Tambe ta sospech’é di  basta arma i 182 kilo kokaina, ku lo a keda konfiská dia 16 di sèptèmber di aña 2016. 30 di yüni di aña 2019 lo a konfiská 23 kilo di mariwana i esaki tambe OM kier pèrsigui Louisyn pe. Durante e tratamentu di e kaso dia 8 di Febrüari último abogado mr. Peppie a duna di konosí ku su kliente su bista dia pa dia ta bayendo hopi atras i ku pa e motibu aki e ke pa sea skòrs e òf dun’é e oportunidat pa por bai operá su bista na Colombia.

E akusado tabata ke a bai operá su wowo na Colombia, paso e no tin konfiansa den e dòkter nan aki nan. Tambe e la splika ku ya e dòkter na Colombia sa di dje paso den pasado e la hera di bai ei nan serka dje pa asina e dòkter por a duna tratamentu médiko pa e wowo. Durante tratamentu di e kaso luna pasa abogado Peppie a splika ku den SDKK e prezu nan ku tin mester kuido médiko no ta hañando esaki manera debe ser i ku e por kue un ehèmpel riba su kliente mes. E zùster nan ku tin den SDKK no tin e tempu pa kontrolá niun detenido ku tin mester asistensia médiko i ku dòkter nan den SDKK ta skars. E akusado ya den pasado a haña problema nan grave ku su wowo unda ku un di su wowo nan debí ku no a hasi tratamentu kuné a bin haña bludu den e wowo.

Den SDKK L. Yeung no por move sin ku e hasi esaki sin su yu òf su ruman ku tambe ta den e instituto. Esaki ta paso e bista di e kliente dia pa dia ta baiendo mas atras. Debí na tur e motibu nan aki e akusado huntu ku su abogado a entrega un petishon na korte pa asina e por a haña e chèns di bai Colombia pa trata e wowo. Den korte di promé instansia Fiskal Janssen no tabata di akuerdo ku e petishon paso segun e Colombia ta un pais di fuga. I si ku na Kòrsou no por duna e akusado e asistensia médiko ku e tin mester mihó opshon ta pa e por bai Hulanda pa asina nan por yud’é. 

Den korte di promé instansia, wes e anulá e petishon di skòrs e akusado pa asina e por a bai Colombia pa bai operá su wowo. Wes tabata di opinion ku e por a keda aki nan na Kòrsou mes pa asina e por a hasi esaki nan.  Ayera e akusado huntu ku su abogado a bai korte di apelashon pa asina por wak si Korte ta kambia di idea.