SHETE BOKA—Despues ku riba 28 di desèmber último ku polis a logra saka dos hòmber fo’i den laman na Shete Boka, algun ora despues a konfiská 349 mata di mariwana na un adrès na Willibrordus. Esaki a sosodé despues ku polis a bai tene un redada  na un adrès na Willibrordus.

Manera ta konosí, durante luna di desèmber, tabatin dos okashon unda mester a bai saka hende na Shete Boka. Polis ta sospecha, tabata un intento pa buska bultonan di droga ku a drif yega kosta. Tabata  primeramente 15 di desèmber ku  den oranan di mardugá  Polisnan na Barber mester a haña e informashon ku un hòmber mester a kai for di baranka na altura di Shete Boka pero no por a subi bek riba su propio forsa. E dia ei e helikòpter di Warda Kosta no tabata den funshon i a opta pa manda e tim di reskate di Brantwer na e sitio. Na yegada di Brantwer nan a tuma nota di e situashon i tabata sumamente riskante pa na e momento ei baha for di baranka i yuda e hòmber ku tabata den laman. E hòmber mes a logra di subi e asina yama “ Banki” kual ta un piedra den laman i tabata sperando yudansa. A warda te na momento ku solo a sali pa asina e tim di reskate tabatin un bon bista i a logra di baha na awa pa por a reskatá e hòmber den laman ku a bai skonde bou di e baranka.

Riba 29 di desèmber a bolbe bai saka e hòmber for di laman na Shete Boka, pero e biaha aki kompaña pa un otro. Einan polis a opta pa bai nan adrès. Na unu di e adrèsnan na Willibrordus a bin haña tres hòmber ku mesora a ranka kareda sali bai. Tim di Aresto a logra pone man riba unu di nan, Suendly O di 27 aña. Un investigashon mas profundo a bin nota ku den kura, tabatin un plantashon di mariwana masha grandi, kual a kondusí na konfiskashon di 348 mata di mariwana.

Suendly O., den korte djabièrnè último a tuma e kargonan riba su lomba i bisa tur tabata di dje. Segun e akusado, e tabata planta pa e ku su famia por huma mariwana. Segun e hues, mr Snitker, 349 mata di mariwana ta sufisiente pa hinter Willibrordus por huma.

Durante tratamentu di e kaso a bin un konfushon unda Suendly O ta biba. Hues mr. Snitker a mustra duda na momento Suendly O. a bis’é ku ta na e adrès ei, esta na Willibrordus e tabata biba, miéntras na inisio di e kaso e la duna un adrès na Souax. Suendly a splika korte ku e ta registrá na Souax pero ta biba na Willibrordus. Hues a menshoná e posibilidat di Suendly a tuma e kargonan riba su lomba

Korte a yega na un kastigu di 90 dia kual 82 kondishonal durante un tempu di prueba di 2 aña. Suendly a sinta 8 dia, lokual ta nifiká e la sinta su kastigu pero ku 82 dia kologando riba su kabes.