WILLEMSTAD,—-E stage prinsipal di ‘Den Ambiente pa un Bon Kousa’, un eksperensha di goso inovativo pa sera un fin di siman den un ambiente úniko pa Kòrsou, ta reservá pa ‘Dibo-D and Friends’. Tur loke keda generá ku e evento aki ta bai pa e lucha kontra kanser.

Riba djadumingu 22 di òktober benidero, di 6’or di atardi pa 10’or di anochi, e lugá di stashoná outo di “CIBC FirstCaribbean”, den kurason di Pietermaai, lo keda transformá den un sitio ideal pa sera un fin di siman i drenta e siman nobo den un tremendo vibe.

‘Den Ambiente pa un Bon Kousa’, ta e evento mayó pa generá fondo na Kòrsou, komo parti di e esfuerso mayó den region pa generá fondo den e lucha kontra kanser, esta CIBC FirstCaribbean Walk for the Cure.

Tur loke keda generá ku aktividatnan di Walk for the Cure na Kòrsou ta bai pa Stichting Prinses Wilhelmina Fonds. ‘Den Ambiente pa un bon Kousa’ lo konta ku aktuashon speshal di “Dibo and Friends”, inkluyendo Randal Corsen, Heinrich “Richie R.” Pieter i Gilmar Freitas miéntras DJ Lu-C tambe lo forma parti di e anochi.

‘Den Ambiente pa un bon Kousa’ lo ta e forma úniko pa selebrá e fin di un wikènt bon meresí unda banda di bon músika lo bo gosa di 6 stashon di kuminda (Sabornan di mundu) miéntras bo ta partisipá na wega i sorteonan. Karchinan pa entrada ta disponibel na CIBC FirstCaribbean.

Pa mas informashon por tuma kontakto ku 433-8000 òf [email protected]. Esnan ku den pasado a partisipá na eventonan di Walk for the Cure sa ku ta importante pa buska bo karchi trempan pa garantisá bo partisipashon. CIBC FirstCaribbean’s Walk for the Cure, e esfuerso mayó pa generá fondo pa e lucha kontra kanser ta selebrá 12 aña den 2023.

E evento a originá komo parti di e banko su selebrashon di su di 10 aniversario i a keda ekspandé pa hinter region unda e banko tin representashon. Tur loke keda generá ku e evento ta bai prinsipalmente pa kompra i mantenshon di ekiponan esensial pa diagnostiká i trata pashèntnan di kanser.