Maria Luisa Garcia di Dierenbescherming, ta bisa ku miéntras tin fondo disponibel lo sigui ku sterilisashon i edukashon.

Willemstad, — Dierenbescherming lo kontinuá ku edukashon di bienestar di animal na 32 skol básiko ku a registrá. E meta ta tambe pa sigui sterilisá kachónan riba kaya.   

Maria Luisa Garcia di Dierenbescherming, ta bisa ku miéntras tin fondo disponibel lo sigui ku sterilisashon i edukashon. Di e parti di edukashon ya kaba Dierenbeschemring ta dos aña bezig edukando skolnan básiko.  E aña aki Dierenbescherming tin 32 skolnan básiko registrá di gruponan 1 te ku 8. Pa loke ta trata sterilisashon di e kantidat di kachonan riba kaya, sterilisashon lo yuda suavisá e situashon. Ta deliberando ku ofisina di turismo pa wak si por risibí e fondonan. E situashon kaminda siudadano no por hiba kachó na e asil ta ferfelu pero e asil tambe tin límite di kapasidat, Maria ta splika. Pero, tin mas organisashon kaminda e siudadano por akudí na dje pa hiba animal, sino mester bai veterinario i pone e animal drumi.

Maria a informá anteriormente ku no ta asina asina e asil tabata pone e kachónan drumi. Esaki debi na reklamo kontra di e asil. Pone e kachónan drumi no ta algu fásil pa empleadonan di Dierenbescherming hasi. Doñonan ku hiba nan kachó ta firma un “afstandverklaring” i asina e animal ta bira propiedat di e asil. Na su turno, e asil lo a  evaluá promé e estado di e animal i wak si ta pone esaki drumi òf ta pone pa adopshon. Manera ta konosí e asil lo tin ku bai sera so portanan ya komo e asil ta enfrentando problemanan finansiero. No tin sufisiente fondo pa por kubri salario di empleadonan, kuminda i remedi pa kachónan. Pa e motibu aki Maria Luisa Garcia di Dierenbescherming ta splika ku ta keda realístiko i wak si kiko ta alkansabel.

Segun kuenta anual di 2022 Dierenbescherming a logra sterilisá 1250 bestia ku fondonan di CTB. E organisashon ta dependé pa gran parti riba otro entradanan pa asina ehekutá lei di Bienestar di Bestia. Na 15 di mart 2021 a sera kontrakt ku CTB pa asina kolekta e kachónan riba kaya, duna nan di kome, chip nan, sterilisá òf kastrá e kachónan. Na yüni 2022 e kontinuá e kolaborashon huntu ku CTB ku un aña mas i tur luna Dierenbescherming mester a reportá bek na CTB tokante di trabounan ku a keda hasí pa loke ta trata sterilisashon. Aktualmente Dierenbescherming ta den deliberashon huntu u ofisina di turismo pa wak kon lo traha huntu e aña aki riba sterilisashon di animal riba kaya.