Mesa: e delegashon na mesa inkluso Pedro Rafael Tellechea kende for di Mart 2023 ta e minister nobo di Asuntunan Petrolero na Venezuela

PARERA—E akuerdo resien entre PDVSA i Refineria di Kòrsou, no ta bai generá èkstra kupo di trabou, pero por eliminá pèrdidanan pronostiká na Curaçao Refinery Utilities. Konforme presupuestonan di e kompania estatal, na Òktober 2022 i kompania a presupuestá un pèrdida di kasi 20 mion florin pa 2023. Mayoria entrada di CRU, ta prosedente di e programa B3 di Curoil, kual programa ta generá entrada pa CRU por finansiá su kostonan.

CRU ta un kompania yu di Refineria di Kòrsou i pèrdidanan na CRU mester wòrdu finansiá pa Refineria di Kòrsou. Den e “swap deal” ku Vigilante a anunsiá for di Novèmber último, PDVSA lo entrega produkto na 45 mion dòler anualmente, kual ta ekivalente na 82 mion florin, brutu sin kota kostonan di operashon. E akuerdo será no ta bai generá mas empleo na Kòrsou, pero ta entrada sigurá pa RdK, ku por yuda finansiá CRU kual último ta sangra. Un otro opshon pa RdK tabata pa ofresé na “factor” e debe riba merkado internashonal i risibi kèsh mesora, pero a opta pa laga PDVSA manda produkto Kòrsou i almasena esaki den tankinan na Bullenbaai.

E problema aktual no ta Refineria di Kòrsou sino CRU. CRU na 2021 a sufri un pèrdida di 35 mion florin miéntras na 2022 tabata pronostiká pèrdidanan di entre 22 pa 24 mion florin. Mas serio ainda, apesar di anunsionan di sosio nobo den refineria, e kompania na 2023 ta pronostikando un pèrdida di por lo ménos 17 mion florin. Esei por nifiká ku Refineria di Kòrsou for di 2021 ta finansiando por lo ménos 75 mion florin di pèrdida na CRU for di 2021. Esei ta nifiká ku e promé benta di produkto ku PDVSA manda Kòrsou pa bende, ta bai kasi kompleto na finansiamentu di e pèrdidanan na CRU.

Pa tal motibu e anunsio di Refineria di Kòrsou i PDVSA, no tei krea kupo nobo, sino ta krea mas fasilidat finansiero pa Refineria di Kòrsou por finansiá e pèrdidanan na CRU i mantené empleo kual ta kostando e kompania kasi 30 mion florin anual, eksklusivo kostonan di konseheronan i tersera parti. Manera menshoná, e fluho di produkto na 45 mion dòler anual, lo generá brutu 82 mion florin pa kaha di RdK, pero ainda mester kita kostonan di almasen, transporte, atministrashon i komishon riba benta.

E fluho di entrada alabes ta forma mas posibilidat den korupshon pa RdK, ku ya a partisipá na kontrabanda den Fuel Oil. Ta konosí den komunidat profeshonal ku RdK i CRU no ta kumpliendo ku prosedernan di Destaho Públiko riba mayoria akuerdo ku kontratistanan lokal. Aparte di esei e organisashon den e proseso di buska un sosio stratégiko pa Kòrsou, a kometé diferente fayo den kumplimentunan responsabel, lagando kompanianan manera Caribbean Petroleum Refinery risibi derechi di negoshashon, miéntras e kompania no tabatin fondo i ku logistikonan kuestionabel.

Manera menshoná, pronóstikonan di CRU no ta mustra alentador sin aktividat riba tereno di Isla. Ta papiando di 34 mion florin di pèrdida na 2021, 23 mion florin na 2022 miéntras na 2023 ya kaba a pronostiká un pèrdida di 11 mion te ku di dos kuartal di 2023.