Dama ta entregá denunsia relatá ku maltrato na su trabou bieu.

Jongbloed,– Riba 26 di aprel un víktima ta entregá denunsia na polis riba akusashon ku el a keda maltratá dor di un doño di un kas di kuido.

Segun e denunsia, e víktima tabata traha na e kas di kuido, pero riba 26 di aprel el a keda maltratá dor di un kolega. Ta trata di un diskushon di pago di salarial i na momentu ku e víktima a yega na ofisina pa wak si e por kobra su salario, e víktima a keda maltratá riba un forma demasiado severo.

Den oranan di mainta e víktima a yega na e kas di kuido. Segun informashon, e departamentu atministrativo a bèl e pa e yega na su trabou bieu kaminda tabata tin tur indikashon e e víktima, kende tabata traha pa e kas di kuido lo risibí su pago. Unabes paden, e víktima a risibí e splikashon ku e no ta bai risibí ningun depchi. “Dado momentu mi a bira emoshonal i mi a dal e mesa kaminda mi a kuminsá yora”. Akinan sin ningun indikashon anterior e èks kolega a kuminsá ranka kabei di e víktima i rank’é te otro banda dje mes.

Mas aleu e víktima a denunsiá ku el a risibí entre otro rudia den kara i moketa basta duru den su kara. “Na e momentu ei mi a kai abou i despues e otro èks koleganan i otro klientenan di edat grandi a wak kon mi a keda maltratá” e víktima a splika na polis.  

Tambe e víktima a splika ku el a purba kore bai na e parti patras di e kamber i aki e telefòn nobo di marka Iphone a kai abou. E èks kolega agresor riba su turno a kue e telefòn i dal esaki i kibr’é na muraya. Despues di esaki e èks kolega a kuminsá grita diferente menasa kaminda un otro èks kolega a intermediá den e situashon. Segun informashon, e èks kolega tabata grita mi a bin na bo kas, pero bo no tabata tei, si mi sa ku bo a bai media òf bo a bai polis, mi lo bin bo kas i kibra tur bo bentananan”. Tambe e agresor a indiká na tur otro èks kolega ku sòru pa esaki ta un lès pa bosnan tur.

Finalmente e dama a indiká ku akinan el a logra bandoná e sitio kaminda e tabata traha i mesora el a opta pa bai warda di polis pa entregá un denunsia. Na momentu ku e víktima tabata reflehá e tabata konvensí ku e maltrato tabata planiá promé ku el a yega na e sitio. Sigur mirando ku e agresor a indiká ku el a bai kas dje víktima kaba den pasado.

Aktualmente e kaso aki ta den investigashon na warda di polis.