NIEUWE HAVEN—Manera publiká den Vigilante, e dos dòknan flotante na Damen a resultá den frakaso grandi. Nan tabata asina bieu, ku na momento e dòknan a yega Kòrsou, ainda tabatin e “Swastika”, símbolo Nazi riba nan.

E dòknan a okashoná nada mas sino miseria (morto) i problema na Dòk. Ta trata di un akuerdo komersial apsurdo ku di un manera of otro, Gobièrnu di Kòrsou e temporada ei a logra pasa, sin risibi reakshon demokrátiko for di Parlamento. Entretantu a keda disidí ku ambos di e dòknan ta bai “scrap” na 2024.

Tabata na Mei 2018, ku Gobièrnu di Kòrsou a anunsiá ku orguyo entrada di dos dòk flotante ku mester a trese mas ekonomia na Kòrsou. Despues a bin resultá ku ámbos di e dòknan, tabata di 1938 pa kual no tabatin muchu efisiensia. Finalmente na Yüni próksimo, si no logra sak’é ta bai kumpli 4 aña ku unu di e dòknan ta bou di laman. E dòknan tabata asina bieu, ku Damen a regalá Kòrsou nan pòrnada pero mester a paga miónes pa trese nan Kòrsou. Na 2024, ta bai kuminsá plania pa manda nan “scrap”.

Manera menshoná e dos dòknan finalmente ta bin kaba na nada sin por a hasi produkshon efisiente. Gobièrnu di e temporada na 2018 a entrega manehá di dòk den man di Damen, ku a burla di Kòrsou pa trese dos dòk flotante ku apénas a sirbi. Unu a senk 2 aña despues di operashon miéntras despues di 6 aña ta bai scrap ámbos.

Despues di 5 aña konsekutivo di pèrdida bou di maneho di Damen, ta parse ku un biaha mas e waf ta hibando pèrdida strukturalmente. Damen no a logra hasi e waf lukrativo. Asina Damen Shiprepair Curaçao (DSCu) a duna di konosé públikamente.  Sinembargo, e pèrdida dje último añanan no a tuma lugá bou di operashon normal. Tabatin diferente faktor ku a stroba e ‘businessplan’ di 2017. E dòknan flotante no a sòru pa un subida di ganashi struktural pa motibu di problemanan tékniko i operashonal. E dos añanan di COVID tambe  tabatin un influensia hopi negativo riba desaroyo di benta.  Pa por determiná si akaso e astiyero na Kòrsou tin derecho di eksistensia, gobièrnu hulandes a kontratá KPMG pa desaroyá un ‘businessplan’ nobo i ahustá huntu ku Damen, CDM Holding i gobièrnu di Kòrsou. “Un desafío grandi pa logra ku e ‘businessplan’ akí ta eksitoso, tabata e nesesidat pa buska espasio di invershon pa por renobá e kondishon tékniko deteriorante di e waf. Durante e añanan tras di lomba, DSCu tabata responsabel pa e mantenshon diario di e waf. Komo operadó dje waf, Damen no ta responsabel p’e invershonnan struktural den e astiyero.”

E dos dòknan tabata asina bieu, ku na momento nan a yega, ainda nan tabatin e símbolo Nazi riba nan. Ta despues a tapa esakinan.