Seguro no por pidi dòkter dirèkt pa informashon médiko di kliente.

Mariepampoen,– Un punto interesante ku a bini dilanti tokante e charla di derechinan médiko ta ku dòkternan ku distruí resultado médiko di un pashènt, por wòrdu kastigá riba forma penal.

Segun Dijkhof, tur pashènt tin derechi pa risibí un opinion adishonal na momentu ku e risibí trato médiko. Dijkhof a splika ku tur hende tin derechi pa konsultá e tan famoso “Google” i tur pashènt tin e derechi pa konsultá dòkternan den eksterior. Ta keda na e dòkter si e dòkter ta usa e rekomendashon nan di otro kolega dòkter pa asina duna un tratamentu médiko adekuá.

Segun Dijkhof, den práktika bo sa haña ku dòkternan sa sinti nan mes ofendí na momentu un pashènt bai pidi rekomendashon adishonal. Mesora e eksperto den leinan médiko a indiká ku bo no mester wòri na momentu e dòkter indiká ku rekomendashon adishonal no ta nesesario. Tur hende tin derechi pa risibí rekomendashon adishonal, pues ta keda na tur hende si nan ta us’é òf no.

Tambe Dijkhof a menshoná un suseso ku a tuma lugá kaminda un dòkter a rabia ku su pashènt a tuma rekomendashon adishonal. “E situashon a eskalá kaminda e dòkter a menasá ku e lo distruí e resultadonan di e rekomendashon, pero danki dios ku esaki no a sosodé”. Segun Dijkhof resultado médiko ta propiedat di e pashènt, pues si e dòkter lo a distruí e resultado, e dòkter lo a distruí propiedat privá”.

Fundashon di Konsumidó ke sigui organisá e tipo di charlanan aki pa asina konsientisá pueblo. E charlanan aki ta kompletamente grátis i ta tuma lugá na nos ofisina na Dr. M.L King Boulevard 29a na Mariepampoen. Pa keda informá di e siguiente charlanan, por sigui e página di Facebook Fundashon pa Konsumidó. Pa kualkier informashon òf siguiente registrashonnan pa charlanan por tuma kontakto ku Fundashon pa Konsumidó na 462 666 òf manda un e-mail na [email protected].