Remfis Donker den seno di direktiva, promé di tuma retiro for di FFK.

Brievengat—Segun Remfis “Empie” Donker, tur hende ta konsiente ku na momento bai hunga e wega final 2do divishon di kampeonato 2021-2022 entre Hubentut  Fortuna i Atletiko Saliña, tur e lokualnan ku a sosodé pa i den e aktual kampeonato ta bira “Nulo”.

Segun Donker den un proposishon ku el a traha, “nos no por nulifika un parti i otro parti no”. Segun Donker, mester wak e proposishon di e grupo enkabesá pa Jean Fransisca mas mihó. E grupo di Jean, ku ta konsistí tambe di Eric Fraai i Stanley Coffie,  ta proponé pa skedjel i hunga e final 2do divishon 2021-2022. Esaki segun Donker outomátikamente ta hasi aktual kampeonato (ku ta práktikamente na mitar) “Nulo”.  Esaki lo trese hopi bruashon administrativo, práktiko i finansiero p.e. mester drai bek tur transfer siendo ku mayoria ekipo no tin e sèn pa duna bek, lokual nan a kobra pa hungadó den transfer.

Un problema grandi segun Donker ta pa proponé FFK revoká transfer di hungadónan di Fortuna i Atletiko so i tur e otro transfer nan si ta keda vigente den un kampeonato ku a keda nulifika. Den e konstelashon aki, un tim mester manda bek hungadó (nan) ku e la paga (HF of AS) pe i awor ta pèrdè e hungadó (nan) aki i no ta haña su sèn bek tampoko.

Mas aleu, ta proponé pa kombertí aktual kampeonato den un torneo i laga tur kontrakt di hungadónan keda vigente. Algun luna pasa e mesun proposishon aki a bini riba mesa pa e torneo “President’s Cup” i práktikamente tur ekipo di 1e divishon a bai kontra i bisa ku esaki ta kontra di nos reglamentu nan. Reglement contractspelers art. 5. Algun ekipo sigur lo bolbe bai kontra.

Segun Donker, e proposishon nan aki lo trese bruashon i diskushon entre e ekiponan. E ta konkluí ku no por e.o. nulifika un kampeonato, duna algun ekipo (2) nan hungadónan bek i otro nan si no ta haya nan hungadónan bek.  Esaki ta lanta diferente protesta.