WILLEMSTAD – A kambia e shofùrnan di transporte eskolar di ta un trahadó partikular i pone nan ofisialmente bou di ABC Busbedrijf, ku e intenshon di fasilitá e proseso p’e mucha/hóben, pero tambe pa yuda e shofùr i su bienestar. Yudansa ku entre otro lo benefisiá e shofùr pa kuminsá risibí un nómina mensual den su man, di manera ku e tambe por yega un dia na remarke pa entre otro hasi un fiansa na banko ètsetera. Pa haña klaridat riba kiko ta bai pasa, Parlamentario Gilbert Doran di MFK ke un asina yamá “ora di pregunta” (Vragenuur) ku Minister di Tráfiko, Transporte i Planifikashon Urbano Charles Cooper i Minister di Enseñansa, Siensia, Kultura i Deporte Sithree van Heydoorn.

Segun Doran, tabata e intenshon insial tambe pa mehorá e situashon finansiero di e shofùr, dunando un kantidat salarial muchu mas mihó i kumbiniente. Esakinan ta algun di e puntonan stipulá den e teoria formulá. Sinembargo, práktika ta demostrando di no t’asina, i ta tresiendo bastante inkietut bou di shofùrnan di transporte eskolar. El a manda un kantidat di 13 pregunta por eskrito ku Minister Cooper i Minister Van Heydoorn lo mester bai kontestá personalmente den sala di Parlamento. Na promé lugá Doran ke sa kon bin ainda e palabrashonnan hasí entre gobièrnu di Kòrsou i ABC Busbedrijf no ta inkulká korektamente. “Tin un persona bou di mando di gobièrnu ku ta vigilá e proseso andando akí?”

Mirando ku esaki ta algu kompletamente nobo, Doran ke sa si a re-evaluá e desishon tumá. Su di 4 pregunta: “Aparte di evaluá ABC Busbedrijf, a sinta i evaluá ku e shofùrnan di transporte eskolar mes tambe? Si pregunta number 4 ta nò, ta den konsiderashon pa hasi esaki ainda? Si pregunta number 4 ta si, e ora ei gobièrnu lo konstatá bastante iregularidat ku ta tumando lugá, meskos tambe bastante konsternashon bou di e grupo akí. Pues e pregunta ku mesora ta surgi ta: e desishon tumá akí, e por ta revokabel? Ta kore e zonido ku shofùrnan te asta dia di awe no ta risibiendo un risibiendo un nómina mensual, manera tabata e palabrashon. Esaki ta kuadra ku bèrdat?”

Segun Doran, ta yega e punto tambe ku tin diskrepansia den kantidatnan di mucha destiná na kada shofùr. Konsekuentemente, e kantidat monetario ku kada shofùr ta gana, ta hopi variá i tin asta sumanan simplemente apsurdo manera 400 florin mensualmente. “Nos ta na altura di esaki? Mirando ku tin bastante punto di atenshon pa ku e situashon aktual di shofùrnan di transporte eskolar, ta tumando e pasonan nesesario pa mehorá e situashon aktual?” Doran a menshoná tambe ku tin bastante mayor ku no ta masha kontentu ku henter e proseso andando, mirando ku e hóben di 15 aña i mas grandi, ya no ta baha dilanti di kas mas pasó nan ta ku ABC Busbedrijf nan ta bai kas, ku ta baha e mucha na punta di hanchi pafó, kreando un situashon di intrankilidat pa mayornan. “Nos ta na altura di esaki?”

E Parlamentario ta añadí den su último preguntanan ku aparentemente tin masoménos 150 alumno/studiante mas pa repartí bou di transportadónan, pero kasi niun hende ta haña mucha. “Unda e alumno/studiantenan akí ta? Ta un posibilidat pa lanta un departamentu i/òf krea un sistema permanente pa atendé problema di transporte serka alumno/mayor, serka transportadó i serka skol? Tambe tin un problema pa ku e ruta di transporte, ya ku algun bario no tin numbernan ku ta sigui otro. Pues posiblemente un shoùr ta risibí dos adrès ku numbernan bastante serka di otro, pero ku den realidat ta keda leu for di otro. Kon por solushoná esaki?” Esaki pues ta e preguntanan ku Cooper i Van Heydoorn lo mester para ketu na dje.