ABC Busbedrijf kende tin un bon plan ku por spar gobièrnu 1.6 mion florin. Pero pa un rasond deskonosí no por ehekutá esaki.

Willemstad,– Djabièrnè tras di lomba parlamento a debatí ku Minister di OWCS i gerensia di ABC Busbedrijf tokante transporte eskolar.

Na Òktober 2022 durante un reunion públiko tokante e mesun tópiko gerensia di ABC Busbedrijf a splika na parlamentu ku aktualmente gobièrnu ta pagando 4.6 mion pa transportá 1915 studiante. Basá riba análisis di datos disponibel, e kompania por spar kasa di gobièrnu alrededor di 1.6 mion florin si reorganisá e sistema di transporte eskolar. Aktualmente ABC ta transportá “solamente” 160 studiante, kompanianan privá di konvoi ta transportá 417 studiante, bùsnan chikí ta transportá 634 studiante, personanan partikular ta transportá 653 studiante i tin 4 taxi ku ta transportá 51 studiante. Tur e gastunan ta suma 4.6 mion.

Ekspertonan di transportashon na ABC a indiká si por reorganisá transporte eskolar, gobièrnu por spar alrededor di 1.6 mion pa aña. Durante e reunion di parlamento na òktober 2022, gerensia di ABC a rekomendá pa vários solushon kaminda ABC por transportá tur mucha riba 14 aña kual lo nifiká ku ABC lo transportá 700 mucha di skol. E konstrukshon aki lo sòru ku e kompania di transportashon por spar gobièrnu alrededor di 1.6 mion pa aña ku por wòrdu utilisá pa invershon den enseñansa por ehèmpel.

Pa spar gobièrnu e 1.6 mion, ABC ta pidiendo pa oumentá nan supsidio ku 650 mil florin.