Transporte eskolar por solushoná diferente problema den tráfiko.

Willemstad,– Durante reunion ku parlamento representante di ABC Busbedrijf, John Cijntje, a splika ku transporte eskolar bon organisá por solushoná pik di tráfiko den oranan di mainta i i pik di tráfiko den oranan di mèrdia.

Djabièrnè tras di lomba, parlamento a tene un reunion den komishon sentral enkuanto e situashon di ABC Busbedrijf pa loke ta transporte eskolar. Durante e reunion minister Van Heydoorn, representantenan di “Autobusbedrijf Curaçao N.V.” i representantenan di shofùrnan di transporte eskolar a duna kontesta riba e preguntanan ku nan a risibí di Miembronan di Parlamento. Liña kòrá den e disertashonnan tabata e importansia di e transportador di e muchanan ku mester yega skol i bai kas bèk.

Durante e reunion John Cijntje di ABC Busbedrijf a splika dikon transporte eskolar mester amplia i no solamente sirbi muchanan di ménos rekurso. Segun Cijntje, tur mainta tur shofùr tin mesun problema, kual ta e kantidat di tráfiko innesesario den oranan di mainta i den oranan di mèrdia. Den mèrdia e situashon aun ta mas peligroso debí ku mayornan ta kore ku velosidat haltu pa buska yu i baha yu na kas pa asina kore duru i yega trabou bèk na tempu.

Cijntje a sigui splika ku si organisá transporte eskolar riba un forma ku tur mucha por utilisá esaki, tráfiko di oranan di mainta i mèrdia lo wòrdu solushoná. Cijntje ta agregá ku aktualmente bo ta haña situashon nan kaminda tin rei di 60 outo ku ke buska e yu dilanti porta di skol. E rei aki ta daña tur tráfiko. Tambe Cijntje a indiká ku mester organisá transporte eskolar riba un forma ku famianan den nesesidat por risibí transporte grátis i famianan ku ta den mihó posishon por paga algu chikí pa yuda kubri e gastu.

Mas aleu Cijntje ta agregá ku famianan bon pará tambe por benefisiá di transporte eskolar. Cijntje tabata splika parlamento ku mayornan di famianan bon pará no mester sali trabou pa buska ningun yu, pues esaki tambe por spar tempu.